Футре: "1987 йили "Олтин тўп"ни Гуллитга эмас, менга беришлари керак эди"

Футре ўша мавсум "Олтин тўп" учун даъвогарлик қилади, аммо овоз беришда Гуллит ўтиб кетади, 106 баллга қарши 91.

"Ҳали ҳам 1987 йилда нима бўлганини тушунмайман. Мен Чемпионлар Кубогини ютдим ва "Атлетико"га ўтдим. Испан клубида ҳам бирдан "Реал"ни 4:0 ҳисобида тор-мор этдик. Мен гол урдим ва иккита ассист қайд этдим.

Шундан сўнг "Олтин тўп"ни менга беришларига амин бўлгандим, аммо уни Гуллитга бериб юборишди. Гуллит фаолияти давомида ушбу мукофотга лойиқ бўлганига шубҳам йўқ. Аммо, у 1987 йилда фақатгина Нидерландия чемпионатини ютганди, бошқа ҳеч нарсани.

Менимча, бу Гуллитни сотиб олган ва қандай харид қилганини ҳаммага кўрсатмоқчи бўлган Берлусконининг иши. У овоз беришга таъсир кўрсатган, ғалати овозлар бўлганди, португал журналисти негадир мени заиф деб баҳолаганди, кейинчалик эса нега бундай деганини менга айтмаганди", - дейди Футре.