Футболимиз келажаги

Ўзбекистон “Маҳалла” хайрия жамоат фонди, Маданият ва спорт ишлари, Халқ таълими вазирликлари, Футбол федерацияси, “Камолот” ёшлар ижтимоий ҳаракати ҳамда қатор давлат ва нодавлат ташкилотлар ҳамкорлигида ташкил этилган мазкур мусобақада юртимизнинг турли ҳудудларидан жами ўн икки маҳалла футбол жамоалари ғолиблик учун баҳслашмоқда.

Мамлакатимизда Президентимиз Ислом Каримов раҳнамолигида болалар спортини ривожлантириш, ўсиб келаётган ёш авлодни ҳар томонлама соғлом ва баркамол инсонлар этиб тарбиялашга доимий эътибор қаратилмоқда. Юртимизнинг барча ҳудудларида барпо этилган замонавий болалар спорти мажмуаларида ўғил-қизларнинг жисмоний тарбия ва спорт билан мунтазам шуғулланиши учун кенг имкониятлар яратилган.

“Футболимиз келажаги” анъанавий республика турнирининг финал босқичи уч ёш тоифасида – 9-10, 11-12 ва 13-14 ёшли ўғил болалардан иборат маҳалла жамоалари ўртасида ўтмоқда. Жорий йилги мусобақанинг қуйи босқичларида бир миллиондан ортиқ бола иштирок этди. Бу ўтган йиллардагидан анча кўпдир.