“Фулад”да яна ғалаба, “Ал-Фатеҳ”да яна мағлубият

Эрон про-лигасида чемпионлик учун бирданига бешта жамоа жиддий кураш олиб бораётгани жорий йилги мавсум қандай муросасиз ўтаётганидан далолат бериб турибди. “Бунёдкор”нинг Осиё Чемпионлар лигаси гуруҳ босқичидаги рақиби “Фулад” клуби 19-тур доирасида меҳмонда “Дамаш Гилан” жамоасини 2:1 ҳисобида мағлубиятга учратди. Ахвазликларнинг ҳар иккала голи бразилиялик Лусиано Чимба ҳисобига ёзилди. Ушбу ҳужумчи айни пайтда Эрон чемпионатининг энг яхши тўпурарларидан бири бўлиб турибди. 19-турдан сўнг “Фулад” 35 очко билан тўртинчи поғонага кўтарилиб олди. Пешқадам – “Пирузи”да 36 очко бор.

Саудия Арабистони чемпионатида эса Чемпионлар лигасидаги рақибимиз “Ал-Фатеҳ”нинг ишлари юришмаяпти. Мамлакатнинг амалдаги чемпиони сафарда “Ал-Тавон” билан куч синашди. Учрашувнинг 75-дақиқасида мезбонлар вакили Аднан Фалатаҳ томонидан киритилган гол учрашувда ягона бўлди ва “Фатеҳ” мағлубиятга учради. 14-турдан сўнг рақибимизнинг очколари сони 14тани ташкил этмоқда ва улар мусобақа жадвалининг 10-поғонасини банд этишган.