Football Leaks "Манчестер Сити"нинг сирини ошкор қилди

Маълумотларга кўра, "Сити" учинчи шахслар томонидан футболчи ҳуқуқларини сотиб олиш учун Кайман оролларида рўйхатдан ўтказилган фонддан фойдаланган. Бу Англияда тақиқланган.

"Манчестер Сити" директорлар кенгаши раиси Ферран Сориано 2012 йилда каталониялик Марк Ингл билан Люксембургда Mangrove консалтинг компаниясини рўйхатдан ўтказган. Ингл бир неча йил давомида Сориано билан "Барселона"да бирга ишлаган.

Улар 10 йил давомида Жанубий Американинг 70 нафар футболчиси ҳуқуқини сотиб олиш учун 30 млн. евро маблағ киритишни режа қилишган. Ички ҳужжатларга кўра, бу маблағни "Сити" ажратиб берган.

Бу вақтда "Манчестер Сити" президенти Ҳалдун Ал-Муборак Кайман оролларида MPI фондига асос солган. Айнан ушбу фонд орқали аргентиналик Бруно Скукулини трансфери амалга оширилган эди. Бу фонд "шаҳарликлар"дан пул оладиган "Mangrove"дан маблағ қабул қилган.

Аммо Скукулини трансфери амалга оширилаётганда "Сити" АПЛга бу компания ва фонд билан алоқаси йўқлигини билдирган. "Манчестер Сити" бу маълумотга изоҳ беришни истамади.

Англия футбол ассоциациясидагилар "Сити"га қарши текширув ишлари олиб бораётганлигини айтишди. Бундан ташқари, Жейдон Санчо ҳам шундай трансферлардан бири сифатида шубҳа қилинмоқда.