Фарғонада “Нефтчи” ёшлар жамоасига саралаш кетмоқда

Аввал хабар берганимиздек, раҳбарият ва мураббийлар штаби таътилга чиқмади аксинча янги мавсум режаларини ишлаб чиқмоқда. Улар “Нефтчи”нинг янги ўйин-услубини яратмоқдалар. Бу борада мураббийлар илк қадамни ёшлардан бошламоқчи. Андрей Фёдоров ва унинг ёрдамчилари ўқув-йиғин машғулотини қай тариқа ўтказиш, трансфер ойнасида қандай ўзгаришлар қилиш борасида ўйлаб, шу ҳақда иш режаларни ҳам жорий этишмоқда.

Шунингдек мураббийлар жамоанинг эртанги куни бўлмиш ёшлар клубига ҳам жиддий эътибор қаратиб келмоқда. Бугунги кунда олий лиганинг кўплаб клубларида очиғини айтиш керак, ўринбосарларнинг қачон йиғилиб, қаерда йиғин ўтказиши номаълум бўлиб турибди. Аммо фарғоналиклар мавсум-2016да ёшлар жамоасини янада ёшартириш ва шу билан бирга муносиб ўйинчиларни йиғиш мақсадида ўтган ойнинг сўнгги кунларидан бошлаб, саралаш босқичини ўтказиб келмоқда.

Йил давомида иккинчи лига ва футбол мактабалари ўтасида ўтказиб келинган мусобақаларни кузатиб борган “Нефтчи” мураббийлари ўша пайтда эътиборини тортган футболчиларни мана бугунги кунга келиб, саралаш босқичига таклиф этган. Асосан 1997 йил ва ундан кичик ёшда бўлган йигитлар бугунги кунда “Нефтчи” ёшлар жамоасига ўтиш учун астойдил тер тўкмоқда.

Футболчилар билан шахсан Мурод Исмоиловнинг ўзи машғулот ўтказмоқда. Ўз вақтида “Пахтакор”даги фаолияти орқали ёшлар билан ишлаш хадисини олган Мурод Музаффарович бугунги кунга келиб, “Нефтчи”да ҳам маҳаллий ёшларга жиддий эътибор қаратмоқда ва жамоанинг эртанги кунига ўзига хос замин яратмоқда дейиш мумкин. Шунингдек саралаш босқичида ёшлар жамоаси устози Баҳром Ҳайдаров ва дарвозабонлар мураббийи Баҳодир Шамсиддинов ҳам бевосита иштирок этиб, ёшларни кўздан кечирмоқда.

Эслатиб ўтамиз “Нефтчи” ёшлар жамоаси январ ойининг бешинчи кунидан ўз қароргоҳида йиғилиб, дастлабки ўқув-йиғин машғулотларига киришишади.