Фарғонада "Ҳоким кубоги" мусобақаси 23-январдан бошланади

 Айни кунларда Фарғона вилояти футбол ассоциацияси томонидан мусобақада иштирок этишни мақсад қилган жамоаларни рўйҳатга олиш ишлари олиб борилмоқда. 

Футбол ассоциациясидаги манбанинг хабар беришича, бу йилги "Ҳоким кубоги" мусобақаси аввалгиларидан ўзгачароқ кўринишда бўлади. Хусусан Фарғона вилояти ҳокимлиги мусобақада ғолибликни қўлга киритган жамоага қимматбаҳо совғаларни ҳозирламоқда. Шунингдек, мазкур мусобақада Суперлига, ПРО-Лига, шунингдек қўшни Қирғизистон ва Тожикистон давлатларидан ҳакамлар жалб этилиши режалаштирилган.

Бизга етиб келган маълумотларга кўра, мазкур мусобақада водий клубларидан ташқари Тошкентнинг "Бунёдкор", Бухоронинг "Бухоро",  жамоалари, шунингдек Тожикистон ва Қирғизистондан ҳам футбол клублари иштирок этадилар. Шунингдек "Нефтчи", "Қўқон-1912", "Турон", "Андижон", "Истиқлол" каби водий клублари ҳам ҳар йилгидек ушбу мусобақада қатнашишлари маълум бўлган. 

"Ҳоким кубоги" мусобақасида футбол учрашувлари "Нефтчи" спорт мажмуаси майдони, Фарғона давлат университети стадиони, Фарғона футбол маҳорат мактаби ўйингоҳи ва Қувасойнинг "Цементчи" стадионларида бўлиб ўтиши белгиланган. Бундан ташқари мусобақанинг финал учрашувини "Истиқлол" стадионида ўтказиш варианти ҳам кўриб чиқилмоқда. 

Championat.asia ижодий гуруҳи мазкур мусобақани тўлиқ ҳажмда ёритиб боришни мақсад қилган. Бизни кузатишда давом этинг!