“Fair-play”ни “Машъал”га беринглар

2025 йилги Ўзбекистон Суперлигаси мавсуми айнан шу жиҳатдан бир жамоани алоҳида ажратиб кўрсатди. Гап Муборакнинг “Машъал” жамоаси ҳақида кетмоқда.

Мавсум давомида турли қийинчиликлар, бегона майдонлар, кучли рақиблар ва турли босимларга қарамасдан, “Машъал” футболга хос энг муҳим қадриятларни сақлаб қолди. Шу боисдан ҳам “Fair-play” мукофотига энг муносиб номзод айнан шу жамоа эканига сабаблар етарлича.

Қизил карточкасиз ўтган бутун мавсум

Мавсумнинг энг қизиқ ва аҳамиятли статистикаларидан бири шуки, “Машъал” Суперлигада қизил карточка олмаган ягона клуб бўлди. 30 турлик марафон давомида муборакликлар футболчилари бор-йўғи 51 марта сариқ карточка билан жазоланди, холос.

Бу шунчаки рақам эмас. Бу – майдондаги интизом, ўзини тута билиш, эҳтиросни назорат қилиш ва ҳакам қарорларига ҳурмат намунасидир. Қизиғи, бундай натижа ўтган йили Навоийнинг “Қизилқум” жамоаси томонидан қайд этилганди. Демак, “Машъал” ушбу ижобий анъанани муносиб давом эттирди. Нима учун мазкур клуб “Fair-play”ни олиши керак деган саволга биринчи жавоб шу эди.

Спорт принциплари устувор қўйилди

Бу йил Суперлигада Қашқадарё вилоятидан учта жамоа иштирок этди. Охирги бор бундай ҳолат 2017 йилда кузатилган. Оддий қилиб айтганда, бир ҳудуд жамоалари ўртасидаги ўйинларда баъзан яширин  “ҳурмат” сезилиб қолади.

Бироқ “Машъал” бу қоидани синдирди. Чемпионлик учун курашаётган “Насаф”га қарши баҳсда муборакликлар майдонда ҳақиқий жанг таклиф қилишди. Ҳеч қандай ташқи омил, турнир жадвали ёки қўшнилик муносабатлари таъсир этмади. Якунда “Машъал”нинг ғалабаси нафақат турнир жадвали тақдирига таъсир қилди, балки Суперлигада спорт принциплари ҳали ҳам мавжуд эканини исботлади.

Ўз уйисиз ҳам яхши мавсум

2025 йилги Суперлигада фақат икки жамоа – “Пахтакор” ва “Машъал” ўз стадионида ўйнай олмади. Агар “Пахтакор” учун “Жар” майдони аввалдан таниш бўлса, “Машъал” учун вазият анча оғир кечди.

Муборакликлар рақибларини Олмалиқ, Ғузор ва ҳатто Қаршида қабул қилишга мажбур бўлди. Бундан ташқари, “Сўғдиёна” билан икки бор Жиззахда, “Сурхон” билан эса икки марта Термизда номинал мезбон сифатида майдонга тушди. Бу эса қўшимча сафарлар, харажатлар ва жисмоний чарчоқ дегани. Шунга қарамай, жамоа интизомдан чекинмади.

Барқарор тизим ва ёшлар натижаси

“Машъал”нинг “Fair-play”га лойиқ эканини кўрсатувчи яна бир муҳим жиҳат – клуб тизимининг барқарор ишлаётгани. Асосий жамоа Про лигадан чиқиб, Суперлигада ўз ўрнини сақлаб қолди. Ўринбосарлар жамоаси мусобақани ўрта ўринларда якунлади.

Энг муҳими, U-19 жамоаси бронза медалларини қўлга киритди. Улар учинчи ўрин учун баҳсда амалдаги финалчи “Бунёдкор”ни Тошкентда мағлуб этди. Бу эса “Машъал” нафақат бугунни, балки эртанги кунни ҳам ўйлаётганини кўрсатади.

Футболда айрим қадриятлар борки, улар вақт ўтиши билан ҳам ўз қимматини йўқотмайди. Интизом, ҳалол ўйин, рақибга ҳурмат ва спорт принципларига содиқлик – шулар жумласидан.

2025 йилги Суперлигада айнан шу жиҳатлар “Машъал” тимсолида ёрқин намоён бўлди. Шу боисдан ҳам бир фикр ўз-ўзидан туғилади:

“Fair-play” мукофоти “Машъал”га берилса, у тўлиқ адолатли қарор бўлади.