Эшитдик-да! Туркманистон - Ўзбекистон учрашуви ўтадиган стадионнинг тегишли ҳужжати йўқ экан

Ўйин Ашхобод шаҳридаги сунъий майдонга эга "Ашхобод" стадионида бўлиб ўтади. Championat.asia сайти маълумотига кўра, мазкур стадионнинг ФИФА сертификати йўқ экан. Аслида бу сертификат олиш учун стадион ҳар 3 йилда текширувдан ўтказилиши керак. Жаҳон чемпионати саралаши регламентига кўра, агар сертификат тақдим этилмаса комиссарда ўйинни бошқа стадионга кўчиришни талаб қилиш ҳуқуқи мавжуд. Масалан, Туркманистондаги "Копетдоғ" стадиони табиий майдонга эга. Сунъий майдонда умуман ўйнаш керак эмас демайман, лекин сунъий майдоннинг ҳам турлари кўп. Мексикага қарши АҚШдаги баҳс ҳам сунъий майдонда ўтганди, унинг сифати умуман бошқа даражада эди. "Ашхобод" стадиони майдонида эса жуда ҳам кўп чуқурчалар бор ва бу тўпнинг юришига кўп бор халал беради.

Яқиндагина "Пахтакор" ОЧЛ доирасида "Аҳал"га қарши баҳсни айнан шу стадионда ўтказганди. Ўша ўйиндан кейин футболчилар ҳам, бош мураббий ҳам майдон ҳолатидан норози бўлишганди. Мухлислар эса буни баҳона сифатида қабул қилишганди холос. Энди миллий терма жамоамиз олдида айнан шундай муаммо пайдо бўлмоқда. Ўз вақтида Ўзбекистон терма жамоаси КХДР (2:4) ва Фаластин (0:2) билан ўйинларни ҳам сунъий майдонда ўтказгани ёдингизда бўлса керак. Қизиғи ҳар иккала баҳсдаги мағлубиятлардан кейин бош мураббий ишдан кетганди.

Жуда ҳам сифатсиз майдонни ОФК қабул қилгани ва Осиё чемпионлар лигасидан сўнг энди Жаҳон чемпионати саралаш баҳсларини ҳам шу стадионда ўтказишга рухсат бераётгани ғалати ҳолат. Ўзбекистон бўлажак ўйинда ғалаба қозонган тақдирда ҳам футболчиларимизда бел ва мушак оғриқлари, кутилмаган жароҳатлар пайдо бўлиши мумкинлиги ташвишга солмоқда. Зеро, бизни 21 ноябрь куни Эронга қарши муҳим ўйин кутиб турибди.

ЎФА бу борада Туркманистон ФФ ва ОФКга мурожаат қиладими ёки йўқми, ҳозирча билмаймиз.