Эшитдик-да: "Локомотив"да даҳшатли йўқотишлар бўлади

Тасдиқланмаган, аммо бизга етиб келган маълумотларга кўра, "Локомотив" жамоаси асосий таркибининг катта қисми "темирйулчилар"ни тарк этиши мумкин.

Олдинроқ Икром Алибоев Жанубий Кореянинг "Сеул" клубига трансфер булганди. Эшитишимизга қараганда, ушбу трансфердан амалдаги чемпионимиз тахминан 800 минг АҚШ доллари атрофида фойда кўрган.

Шунингдек, Санжар Шоаҳмедов, Сардор Рашидов, Сардор Мирзаев, Олег Зотеев, Марат Бикмаев каби футболчилар ҳам катта эҳтимол билан легионер мақомида фаолиятларини давом эттиришлари мумкин. Уларга ҳам хориж клубларидан қатор таклифлар тушган.

Жамоанинг ўнг канот ҳимоячиси Шуҳрат Муҳаммадиевга "Пахтакор" томонидан қизиқиш жуда жиддий. Юқорида исми тилга олинган футболчилар аксарияти жамоада қолиши ҳам мумкин. Аммо ҳозирча уларнинг кейинги фаолияти қаерда давом эттирилиши номаълум.

Аввал хабар берганимиздек, АГМК сафида яхши мавсумни ўтказган легионер ярим ҳимоячи Йован Жокич "Локомотив" билан шартнома имзолайди. Фақат бу ўтиш расман трансферлар ойнаси очилганида рўйхатдан ўтказилади.

Шунингдек, "Бунёдкор" ҳужумчиси Филипп Райевац "Локомотив"га ўтиши мумкин.

Эслатиб ўтамиз, Ўзбекистонда трансфер ойнаси 17 декабрь куни расман очилади. Бу ҳақда аввалроқ хабар бергандик.