Эрве Ренар: "Об-ҳаво бизга муаммо туғдириши мумкин, аммо..."

"Барчага хайрли кун. Бу ўйин гуруҳдаги энг муҳим ўйинлардан бири. Охирги натижалар туфайли ҳам эртанги ўйин натижаси жуда ҳам муҳим. Эртага фақат ижобий натижа учун майдонга тушамиз", - дейди Эрве Ренар.

"Биламизки биринчи ўринни олган жамоа 100 фоиз кейинги босқчига чиқади. Иккинчи ўрин соҳиби эса бошқа гуруҳларга эътибор қаратади. Эртага ғалаба қозонган жамоа катта эҳтимол билан гуруҳ ғолибига айланади. Шундай экан биз фақат ғалаба учун ҳаракат қиламиз", - дейди Муҳаммад Ал Овайс. 

- Ўзбекистоннинг кучли ва кучсиз томонларини айтиб ўтсангиз. 

- Ўзбекистон Осиёнинг энг кучли терма жамоаларидан бири. Доим уларга қарши ўйнаш қийинчилик туғдиради. Марокаш бош мураббийи бўлиб ишлаганимда Ўзбекистон билан ўртоқлик учрашуви ўтказган эдик. Ўшанда биз ғалаба қозонган бўлсакда осон ўйин бўлмаган эди. 

- Ўзбекистон ЖЧ-2022 саралашини омадсиз бошлади. Кейин мураббий алмашгач иккита ғалаба қўлга киритилди ва биринчи ўринга чиқиб олди. Бунга рақиб сифатида қандай муносабатда бўлдингиз? 

- Фаластинга қарши сафарда ўйнаш доим қийин бўлган. Ўша баҳсда Ўзбекистон ёмон ўйнамаганди. Биз ҳам биринчи марта Фаластинга қарши сафарда ўйнадик ва жуда ҳам қийин дурангга эришдик. Мен Эктор Куперни жуда ҳам ҳурмат қиламан. 

- Эртага стадионга кўплаб мухлислар келади, бундан ташқари об ҳаво совуқ бўлиши кутилмоқда. Бу омиллар Саудия Арабистонига босим ўтказмайдими? 

- Албатта об ҳаво бизга муаммо туғдириши мумкин. Юртингизда +3 даража илиқ экан, шу боис ҳам икки кун олдин Ўзбекистонга етиб келдик. Аммо унутмаслик керакки 2020 йил июль ойида Жидда шаҳрида жавоб баҳси бўлиб ўтади. Ўшанда жуда ҳам иссиқ бўлади. 

- Сиз Африка қитъасида бир қатор терма жамоаларда ишладингиз. Энди эса Осиёда ишлаяпсиз. Қайси қитъа сизнингча кучлироқ? 

- Турли хил қитъаларида қатнашадиган жамоаларни таққослаш учун энг яхши йўл бу Жаҳон чемпионати. 2018 йил Россияда ўтган мундиалда Саудия Арабистони Мисрни 2:1 ҳисобида мағлуб этган эди. Ўшанда Саудия Арабистони жуда ҳам яхши ўйин намойиш этган эди. 

- Терма жамоа бу саралашда икки марта дуранг ўйнаб муҳим очколарни йўқотди. Натижада иккинчи ўринга тушиб қолди. Бу эртанги муҳим баҳсдан олдин босим юкламайдими? 

Муҳаммад Ал Овайс: - Осиё қитъасидаги барча жамоаларнинг савияси ўсиб бормоқда, шу боис очко йўқотиш одатий ҳол. Биз Ўзбекистон терма жамоасини жуда яхши биламиз, бу мамлакат клубларига қарши ОЧЛда кўп ўйнаганмиз. Эртага қизиқарли баҳс бўлишини кутаяпман. Албатта ҳаво совуқ, аммо чидаб бўлмайдиган даражада эмас. Биз Ўзбекистон терма жамоаси ўйинларини кўриб, ўрганиб чиқдик.