"Энфилд Роуд"даги бетакрор ўйинга бир йил тўлди

Жумладан, ярим финал босиқичининг иккала жуфтлиги ҳам мухлисларга бир олам ҳаяжон, эмоция тақдим қилганди.

"Барселона" — "Ливерпуль"

Мазкур жуфтлик ўртасида Каталонияда ўтказилган биринчи баҳсдан (3:0) кейин бутун дунё Месси тепган жарима тўпини муҳокама қилар, "кўк-анорранглилар"нинг финалдаги рақиби ким бўлиши, "Тоттенхэм" ёки "Аякс" "Барселона"га қаршилик қила оладими қабилидаги саволларга ўзича жавоб изларди. "Ливерпуль"нинг энг ашаддий мухлислари ҳам Салоҳ ва Фирминосиз жамоанинг Месси бошчилигидаги каталонларга қарши мўжиза кўрсата олишига деярли ишонмаган бўлса керак. Фақат Клопп ва унинг йигитларигина бунга охиригача ишонишди ва исботлашди.

Учрашувга қадар Луис Суарес УЕФА расмий сайтига интервью берган: "Ливерпуль"даги ажойиб мавсумлардан кейин яна "Энфилд"га қайтяпман. Бу мен учун ўзгача аҳамият касб этади. ЕЧЛ финалига қадар етиб бориш жуда мушкул вазифа. Биринчи ўйиндан кейин биз бунга жуда яқинмиз. Лекин қаерда ўйнаётганимизни унутмайлик. Бу ерда мухлислар бир сония ҳам тўхтаб қолишмайди. Ўтган йили "Рома"га қарши ўйинда йўл қўйган хатоларимизни такрорламасликка уринамиз. ЕЧЛда ярим соат эмас, бир дақиқага тўхтаб қолиш ҳам сизни мусобақадан чиқариб юборади".

Жавоб ўйинидан бир кун олдин Трент Александер-Арнольд шундай деганди: "Албатта, рақибларимизнинг барчаси жаҳон юлдузлари, аммо уларга етарлича муаммо туғдиришимизга ишонаман. "Барса"га қарши учрашувларда Месси ёки бошқа ўйинчига алоҳида эътибор қаратиш керак эмас, барчага қарши бир хил ўйнаймиз. Бизнинг йўқотадиган нарсамиз қолмади, мухлисларимиз учун охирги сонияларгача ҳаракат қиламиз". 

Ўйин ўтган йилнинг айни кунида ўтказилганди ва якунда Трентнинг фикрлари ўз тасдиғини топди. "Барселона" учун энг катта муаммони ўйин охирида айнан унинг ўзи туғдиргани ёдингизда бўлса керак. Марҳамат, қуйида ўша лаҳзаларни эслаш учун учрашувдаги хавфли вазиятларнинг видеолавҳасига эътибор қаратишингиз мумкин.

2018-19, ЕЧЛ. Плей-офф. 1/2 финал

"Ливерпуль" - "Барселона" 4:0 (биринчи ўйин - 0:3)

Голлар: Ориги, 7 (1:0); Вейналдум, 54 (2:0); Вейналдум, 56 (3:0); Ориги, 79 (4:0)

"Ливерпуль": 13. Алисон, 3. Фабиньо, 4. ван Дейк, 26. Робертсон Э. ( 46') , 10. Мане, 14. Хендерсон, 27. Ориги (85') , 66. Александер-Арнольд, 7. Милнер, 32. Матип, 23. Шакири (90')

Заҳирадагилар: 22. Миньоле, 6. Ловрен, 24. Брюстер, 58. Вудберн, 5. Вейналдум (46') , 12. Гомез (85') , 15. Старридж (90').

"Барселона": 1. Тер Штеген, 15. Лангле, 18. Альба Х., 3. Пике, 5. Бускетс, 7. Коутиньо (60') , 20. Роберто С., 22. Видаль (75') , 4. Ракитич (80') , 9. Суарес Л., 10. Месси

Заҳирадагилар: 13. Силлессен, 23. Юмтити, 24. Вермален, 26. Аленья, 2. Семеду Н. (60') , 8. Артур Рамос (75') , 14. Малком (80').

Огоҳлантиришлар: Фабиньо 11', Матип 66' - Бускетс 45', Ракитич 53', Семеду Н. 76'.  

Ўйиндан кейин "Барселона" ҳужумчиси Луис Суарес шундай фикрларни билдирганди: "Рақиб тўртинчи голни урганида биз мактаб болаларига ўхшаб қолдик. Албатта, ҳозир биз ва мухлисларимиз учун жуда қайғули вазият. Аммо ҳар қандай танқидларга тайёр туришимиз керак".

"ЛИВЕРПУЛЬ" СУПЕРКАМБЕК КЎРСАТГАН ҲОЛДА "БАРСЕЛОНА" ТЎСИҒИДАН ЎТИБ, МУСОБАҚАНИНГ ФИНАЛИГА ЙЎЛ ОЛДИ! 

Фахриддин Рўзиев тайёрлади