Энди ким неча балл олгани ҳакамларнинг ўзига ҳам айтилмайди

Қуръа ташлаш маросими ўз якунига етганидан сўнг ҳакамлик ва бошқа масалалар бўйича очиқ суҳбат давом этди. Бунда ҳар ким ўз фикрини билдириш имконига эга бўлди.

Яхши биласиз, биз шу пайтгача олий лиганинг ҳар бир ўйинидан кейин ҳакамларга қўйилаётган балларни билиб келаётгандик. Аммо ўтган йил баъзи гап-сўзлардан кейин ҳакамларга қўйилган баҳолар матбуотда эълон қилинмайдиган бўлди.

Кечаги йиғилишда иштирок этган ЎФА Ҳакамлар ва назоратчилар бошқармаси бошлиғи Маъмур Саидқосимовнинг айтишича, бу йилдан эътиборан қайси ҳакамнинг неча баҳо олгани нафақат матбуот, балки ҳакамларнинг ўзига ҳам эълон қилинмайди. Яъни, бундан буён назоратчи ўйин якунига етганидан сўнг ҳакамлар қандай бошқаргани тўғрисида ўз фикрини айтади, бироқ қўйиладиган балларни маълум қилмайди. "Бу фақат бизда эмас, ОФК ҳам мусобақаларда шу усулдан фойдаланиб келади", - деди Маъмур Саидқосимов бу борада.