ЕЧЛ. "Монако"дан "камбэк" кўрамизми?

Европа чемпионлар лигасининг нимчорак финал ўйинлари бизга бир қатор бир-биридан қизиқарли ва шиддатли футбол учрашувларини туҳфа қилди.

Манчестерда заргарона тарзда ўтган "Манчестер Сити" - "Монако" беллашуви, Париждаги ПСЖнинг "шовқини", Мюнхен ва Лондонда "Арсенал"нинг парчаланиши, Каталонияда "Барселона" кўрсатган мўъжиза ҳамда кечаги "Лестер"нинг эртаги ҳали кўп вақт мухлисларнинг ёдидан чиқмаслиги аниқ.

Шундай ўйинлар борлиги учун ҳам чемпионлар лигасини севамиз.

Бугун ниҳоят чорак финал йўлланмасини қўлга киритадиган охирги иккита жамоалар аниқланади.

Биринчи баҳсда керакли ғалабани қўлга киритган "Манчестер Сити"га жавоб ўйинида осон бўлмаслиги аниқ.

"Атлетико" дастлабки ўйинда меҳмонда жуда ишончли ғалабани қўлга киритган. Шу боисдан ҳам улар бугун бироз хотиржамликка берилишлари мумкин. Лекин Каталониядаги ўйин тажрибасидан келиб чиқадиган бўлсак, Диего Симеоне имкон қадар футболчиларни 90 дақиқа диққатли бўлишларини талаб этади. "Атлетико" агарда учрашув давомида консентрацияни йўқотмаса, унда "Байер" ўз майдонида қила олмаган ишни "Висенте Кальдерон"да амалга ошириши бу баҳорда қор ёғишига тенг. Лкин Баҳорда қор ёғиб туришини инобатга оладиган бўлсак, ҳали назарий жиҳатдан "Атлетико" тўлиқ хотиржамликка берилишига эрта. "Атлетико" европанинг энг кучли саккиз жамоаси орасига кириш учун камида 90 дақиқани муносиб тарзда ўтказмоғи лозим.

Францияда эса биринчи учрашувда қўйиб берилган спектакль яна давом этиш эҳтимоли юқори. "Монако"нинг "Этихад"да кўрсатган ажойиб ўйинини якунда Гвардиола жамоаси метин ирода намойиш этиб "синдирганди". Бу галги тўқнашувда "Монако"га ўз уйидаги "деворлар" ҳам кўмаклашиши мумкин. Бу жуфтлик тақдири ҳали номаълум, гарчи "Сити"да иккита тўп фарқидаги устунлик мавжуд бўлсада, "Монако"нинг тажовузкор ўйини бу тафовутни йўққа чиқара олиш салоҳиятига эга.

Европа чемпионлар лигаси, 1/8 финал.

Жавоб ўйинлари.

"Монако" - "Манчестер Сити" (00:45)

"Стад де Луис" стадиони.

Бош ҳакам: Жанлука Рокки.

Биринчи учрашув: 3:5

"Атлетико" - "Байер" (00:45)

"Висенте Кальдерон" стадиони.

Бош ҳакам: Сергей Карасев.

Биринчи учрашув: 4:2