ЕЧЛ. Чорак финалда хет-трик қилган беш азамат

Биз мусобақанинг айнан шу босқичида битта ўйинда камида 3та гол урган футболчилар ҳақида маълумот беришга қарор қилдик.

1998 йил март ойида "Ювентус" клуби чорак финалда Киевнинг "Динамо" клубига қарши тўқнаш келган. Биринчи баҳс Туринда бўлиб ўтган ва 1:1 ҳисобида тугаганди. Жавоб ўйини эса Филиппо Инзагининг бенефисига айланиб кетган. "Пиппогол" 100 мингдан зиёд томошабин келган ўйинда киевликлар дарвозасига учта гол уришга эришган. Ўша йил "Юве" финалгача бориб "Реал"га мағлуб бўлганди.

18 март 1998
"Динамо Киев" - "Ювентус" 1:4
Голлар: Ребров 54 - Инзаги 29, 65, 73, Дель Пьеро 87

Орадан икки йил ўтиб чорак финалда хет-трик кузатилганди. "Валенсия" ярим ҳимоячиси Херард Лопез Римнинг "Лацио" клубига қарши ўйинда 3та гол уришга эришганди. Жавоб баҳсида "Лацио" 1:0 ҳисобида зафар қучганди. Испания клуби ўша мавсумда финалга қадар етиб борган ва "Реал"га ютқазиб қўйганди.

05 апрель 2000
"Валенсия" - "Лацио" 5:2
Голлар: Ангуло 2, Херард Лопез 4, 40, 80, Клаудио Лопез 90+1 - Симеоне Инзаги 28, Салас 87.

2003 йилги чорак финалида суепртўқнашув бўлиб ўтганди. МЮ ва "Реал" ўртасидаги илк ўйин Мадридда бўлиб ўтганди - 3:1. "Олд Траффорд"даги жавоб ўйини ҳақиқий спектаклга айланиб кетганди. Майдон эгаларининг тўртта голига "галактикос" сафида бразилиялик Роналдонинг бир ўзи учта гол билан жавоб берганди - 4:3. "Реал" ўша йил мусобақанинг ярим финалида икки ўйин натижасига кўра "Ювентус"га имкониятни бой бериб қўйганди.

23 апрель 2003
"Манчестер Юнайтед" - "Реал Мадрид" 4:3
Голлар: Ван Нистелрой 43, Элгуера 52 автогол, Бекхэм 71, 85 - Роналдо 12, 50, 59

2010 йил чорак финалда "Арсенал" ва "Барселона" клублари тўқнаш келишганди. Лондонда ўтган биринчи учрашувда томонлар жанговор дуранг қайд этишганди - 2:2. Каталонияда ташкил этилган жавоб баҳси эса майдон эгалари ҳужумчиси Лионель Мессининг бенефисига айланиб кетганди. Аргентиналик футболчи ўша оқшом "канонирлар" дарвозасига 4та гол урганди. "Барселона" ўша ярим финалда бўлажак чемпион "Интер"га ютқазиб қўйганди.

06 апрель 2010
"Барселона" - "Арсенал" 4:1
Голлар: Лионель Месси 21, 37, 42, 88 - Николас Бендтнер 18

Ниҳоят ушбу мақола ёзилишига сабабчи бўлган хет-трикка ҳам етиб келдик. Мадриднинг "Реал" клуби чорак финалнинг биринчи ўйинида Германиянинг "Вольфсбург" клуби меҳмони бўлиб кўпчилик учун кутилмаганда 0:2 ҳисобида мағлубиятга учради. Жавоб баҳсида эса Криштиану Роналду биринчи бўлимда иккита, иккинчи бўлимда битта гол уриб "Қироллик клуби"га ярим финал йўлланмасини олиб берди - 3:0. Ярим финалда "Реал" Англиянинг "Манчестер Сити" клубига қарши ўйнайдиган бўлди.

13 апрель 2016
"Реал Мадрид" - "Вольфсбург" 3:0
Голлар: Криштиану Роналду 15, 17, 77

Нарзулла Сайдуллаев тайёрлади