Даврон Файзиев: "Ўз хатоларимиз туфайли яна мағлуб бўлдик"

"Биз бугун фақат натижа учун ўйнадик. Биринчи бўлимдан сўнг мен йигитларга шундай ўйнашда давом этишимизни айтгандим", - деб гап бошлади Файзиев.

"Биринчи голга келадиган бўлсак, хатодан ҳеч ким кафолатланмаган. Ўтган ўйинда энг яхши футболчи бўлган Александр Меленчук бугун хатога йўл қўйди. Уни айбдор деб айта олмайман. Сабаби майдон ҳолатини кўрдинглар, биз ҳам рақиб ҳам қийналди. Оддий хатолар туфайли йигитларнинг руҳияти тушиб кетмоқда. Бундай вазиятлар жуда кўп бўлмоқда. Натижа учун мен жавоб бераман. Бугун камида дуранг ўйнашга уриндик. "Бунёдкор" биздан устун ўйнагани йўқ, ўз хатоларимиз эвазига мағлуб бўлдик. Агар рақиб икки уч карра устун ўйнаб ютганида тан берардим".

"Куни кеча Жиззах вилояти ҳокими клуб қароргоҳига келиб бизга далда бериб кетгандилар. Уларга эътибор учун раҳмат айтмоқчиман, лекин эътиборни янада кучайтирмасак аҳволимиз жуда ёмонлашиб кетмоқда. Агар қийинчиликларни енгиб ўтсак марра бизники бўлади".

"Мухлисларга раҳмат айтмоқчиман. Улар бизни ажойиб тарзда қўллаб туришди. Тан оламан биз чиройли ўйиндан кўра натижани устун қўйиб ўйнадик", - дейди Даврон Файзиев.