ЦСКА легионер футболчисини Ўзбекистонга юборди

Россиянинг ЦСКА клуб эронлик ҳимоячи Амирҳусайн Риванди билан 2026 йилнинг ёзига қадар шартнома имзолади.

Шу билан бирга, 20 ёшли футболчи ўйин амалиётини ўташ учун "Бухоро"га ижарага берилади.

Ўзбекистон Про лигаси клуби билан шартнома сотиб олиш ҳуқуқисиз йил охиригача амал қилади.

Бош директорнинг спорт масалалари бўйича ўринбосари Евгений Шевелев мазкур қарор ҳақда шундай деди: "Амир клуб мураббийлар штаби ва спорт раҳбариятида яхши таассурот қолдиргани учун иқтидорли футболчи билан шартнома имзолашга қарор қилинди. Аммо керакли ўйин амалиётига эга бўлиш ва янада ривожлантириш мақсадида Амир йил охиригача Ўзбекистонга ижарага берилади. Шу билан бирга, футболчи қишки ўқув-машғулот йиғинларини ЦСКАдаги жамоадошлари билан бирга ўтказиши режалаштирилган".

Москваликлар сафига тез орада Ўзбекистон олимпия терма жамоаси ярим ҳимоячиси Аббос Файзуллаев қўшилади ва навбатдаги ўйинга тайёргарликни бошлайди.