Coca Cola Суперлигаси. 17-тур лауреатлари
01 sep 2022 11:48
News

Coca Cola Суперлигаси. 17-тур лауреатлари

Куни кеча Coca Cola Суперлигасининг 17-туридан ўрин олган ўйинлар бўлиб ўтди.

Championat.asia ўтказилган баҳслар асосида тур лауреатларини аниқлади.

"Локомотив" бу тур "Насаф" билан муроса кўчасини танлади – 0:0. "Темирйўлчилар" посбони шу куни ўз маҳорати ва даражасини кўрсатиб, дарвозани муносиб равишда қўриқлади. Шу боис, "Локомотив" дарвозабони Абдумавлон Абдужалилов Championat.asia сайти талқинига кўра, 17-турнинг энг яхши дарвозабони деб топилди.

"Олимпик" мазкур турда кучлилар қаторида бораётган Жиззахнинг "Сўғдиёна" клуби билан баҳс олиб бориб, 1:0 ҳисобида устун келди. Тимур Кападзе шогирдлари шу куни ёрқин ўйин намойиш қилишди ва ҳақли ғалабага эришишди. Шундай қилиб, Championat.asia сайти талқинига кўра, Тимур Кападзе 17-турнинг энг яхши мураббийи дея эътироф этилди.

Бу турда "Пахтакор" ҳимоячиси Ҳожиакбар Алижонов "Навбаҳор"га қарши "йил тўқнашуви"да ўзига хос зарбаси орқали тур голига муаллифлик қилди.

"Нефтчи" ярим ҳимоячиси Аброр Исмоилов "Қизилқум"га қарши беллашувда дубль қайд этиб, фарғоналикларга муҳим ғалаба келтирди. 24 ёшла хавбек ўйинда белгиланган пенальтини муваффақиятсиз амалга оширганига қарамасдан, учрашувда 2 та гол уришга эришди ва Championat.asia талқинига кўра 17-турнинг энг яхши футболчиси деб топилди.