Coca Cola Суперлига. 5-тур превьюси (фақат рақамлар)

Coca Cola Суперлига. 5-тур
19 июнь, жума
“Қўқон-1912” – “Қизилқум”
Ҳакамлар: Вадим Агишев, Ришат Нугманов, Хусан Набиев, Акмал Раҳимов
Назоратчи: Бахтиёр Тоғаев
Комиссар: Жаҳонгир Раҳматуллаев

Рестартни мағлубият билан бошлаган икки клуб ўртасидаги баҳс. Бу жамоалар шу пайтга қадар чемпионат доирасида 18 марта тўқнаш келишган. Ўйинларнинг 6тасида қўқонликлар, 11тасида навоийликларнинг қўли баланд келган. Битта учрашувда дуранг натижаси қайд этилган. Ўтган мавсум ўзаро ўйинларда сафарда ўйнаган жамоа ғалаба қозонгани эътиборга молик. Навоийда "Қўқон-1912" 1:0 ҳисобида ютган бўлса, Қўқонда "Қизилқум" 2:1 ҳисобида муваффақиятга эришган.

“Пахтакор” – “Бунёдкор”
Ҳакамлар: Шерзод Қосимов, Санжар Шоюсупов, Алишер Усмонов, Раҳим Каримов
Назоратчи: Ғайрат Каримов
Комиссар: Лазиз Қўчқоров

Вадим Абрамов ва Шота Арвеладзе тўқнашуви. Чемпионатлар тарихида бу жамоалар 28 беллашувда майдонга тушишган. Уларнинг 10тасида "Пахтакор" зафар қучган бўлса, 9та баҳсда дуранг кузатилган. Яна 9та баҳсда "Бунёдкор" ғолиб бўлган. Бир йил олдин ушбу жамоалар ўртасидаги баҳслар ғалати бўлган. Биринчи даврадан ўрин олган "Бунёдкор" - "Пахтакор" учрашуви "Пахтакор" стадионида ўтказилган ва унда номинал меҳмонлар 2:1 ҳисобида ғалаба қозонишган. Иккинчи даврадан ўрин олган "Пахтакор" - "Бунёдкор" учрашуви эса "Бунёдкор" ўйингоҳида ташкил этилган ҳамда унда номинал меҳмонлар, яъни "қалдирғочлар" 3:2 ҳисобида зафар қучишган. "Шерлар" 2019 йилги мавсумда чемпионатда бир бор мағлуб бўлишди ва ўша мағлубият Вадим Абрамов бошчилигидаги "Бунёдкор"дан қабул қилинганди.

20 июнь, шанба
“Навбаҳор” – “Бухоро”
Ҳакамлар: Виктор Серазитдинов, Александр Сидоров, Аваз Абдуллаев, Ахмад Эргашев
Назоратчи: Тимур Абдуллаев
Комиссар: Ахмед Тиллаев

Бу икки клуб Ўзбекистон чемпионатлари тарихида шу кунга қадар 56 бор тўқнаш келишган. 31та учрашувда "лочинлар"нинг қўли баланд келган. 16та баҳсда "Бухоро" 3 очко эгасига айланган ва 9та ўйинда ғолиб аниқланмаган. Ўзаро ўйинларнинг охирги 8тасида "Бухоро" ушбу рақибни умуман мағлуб эта олмаган. Сўнгги бор бухороликлар "Навбаҳор"ни 2016 йилги мавсум Наманганда мағлуб этишган эди.

“Локомотив” – “Сўғдиёна”
Ҳакамлар: Азиз Асимов, Хусниддин Шодмонов, Александр Буров, Илья Ильин
Назоратчи: Дмитрий Роман
Комиссар: Шоҳрух Саид

Рестартни икки хил кайфиятда бошлаган клублар ўртасидаги баҳс. Ушбу жамоалар миллий чемпионат доирасида ҳозирга қадар 24 бор ўзаро ўйин ўтказишган. 17та ўйинда "темирйўлчилар" муваффақият қозонишган. 3 марта жиззахликлар зафар қучишган. Қолган 4та ўйинда дуранг кузатилган. "Локомотив" ўз майдонида "Сўғдиёна"га қарши 12та ўйин ўтказган ва 12 марта ғалабага эришган. Жиззах клуби ушбу жамоа майдонидаги 12та баҳсда жами 3та гол ура олган холос. "Темирйўлчилар" уйида ўтган охирги 3та учрашувда меҳмонлар умуман гол ура олишмаган.

АГМК – “Сурхон”
Ҳакамлар: Рустам Лутфуллин, Абдуҳамидулло Расулов, Олим Абдувосилов, Абдурашид Худойберганов
Назоратчи: Константин Смирнов
Комиссар: Эркин Бахтиёров

Бу жамоаларнинг ўзаро ўйинлари тарихи қисқа ва бу ўтган мавсумдан бошланган. Ҳозирга қадар ўтган икки ўйинда иккала жамоа биттадан ғалабага эришган. Олмалиқдаги баҳсда АГМК 2:0 ҳисобида ғолиб бўлган, Термизда эса "Сурхон" 1:0 ҳисобида зафар қучган. Бу мавсум АГМК Coca Cola Суперлигасида мағлуб бўлмаган иккита клубдан бири бўлиб турибди. "Сурхон" эса бу йилги ягона ғалабасини сафарда қўлга киритди.

21 июнь, якшанба
“Андижон” – “Металлург”
Ҳакамлар: Равшан Абдувоҳидов, Зуфар Элибоев, Фарҳод Усмонов, Ғайрат Жўраев
Назоратчи: Игорь Нехочин
Комиссар: Муҳаммад Содиқ Содиқ-Охунов

Ушбу клублар ҳозирга қадар Ўзбекистон чемпионатида 36 марта ўзаро ўйин ўтказишган. Шундан 14тасида Бекобод клуби, 12тасида Андижон клуби ғолиб бўлган. Қолган 10та учрашувда томонлар муроса кўчасини танлашган. "Металлург" ўз тарихида бир марта Андижонда ғалабага эришган (2011 йил). "Бургутлар" ўз майдонидаги сўнгги 6та ўйиннинг фақат биттасида ғолиб бўлишган (4та дуранг ва 1та мағлубият). "Андижон" бу мавсум 4-турдан кейин ғалаба қозона олмаган учта клубдан бири бўлиб турибди.

“Машъал” – “Насаф”
Ҳакамлар: Шавкат Насибуллаев, Расул Фозилов, Максим Нехочин, Рустам Чориев
Назоратчи: Маъмур Саидқосимов
Комиссар: Сардор Қудратуллаев

Қашқадарёнинг икки клуби рестартни бир хил, 2:2 ҳисобидаги натижа билан бошлашди. Бу жамоалар ҳозирга қадар 30 бор тўқнаш келишган. 16та учрашувда "аждарлар" ғолиб бўлган, 8та ўйинда "газчилар" зафар қучишган. Яна 6та баҳсда дуранг қайд этилган. Муборакда ўтган 15та учрашувдан 3тасида "Насаф" ғалабага эришган. Бу жамоалар ўртасидаги охирги 3та учрашувнинг барчасида "Насаф" ғолиб бўлган. Жорий мавсум "Машъал" Муборакда иккита ўйин ўтказди ва умуман мағлуб бўлмади. "Насаф" эса сафарда иккита ўйинда майдонга тушди ва иккита ғалабага эришди.

Нарзулла Сайдуллаев тайёрлади