“Бунёдкор” – “Локомотив” учрашуви ҳеч қаерга кўчирилмайди

Ушбу учрашувлар “Бунёдкор”, “Жар” “Пахтакор” стадионларида ўтказилади. Суперлига тақвимига кўра “Бунёдкор” 21 сентябрь куни ўз майдонида “Локомотив”ни қабул қилиши керак. Саралашнинг “E” гуруҳи баҳслари “Пахтакор” стадионида ўтади. Ушбу гуруҳдан Жанубий Корея, Ўзбекистон, Мўғулистон ўрин олган. “F” гуруҳидаги учликда Филиппин, Гонгконг, Непал аёллар терма жамоалари жойлашган. Улар “Жар” стадионида тўп тепишади. “G” гуруҳи ўйинлари “Бунёдкор” стадионида ўтиши режалаштирилган. Ўйлантираётган жиҳати “қалдирғочлар”нинг “Локомотив”га қарши ўйини кўчириладими? Биз бу масала юзасидан клуб бош директори Улуғбек Мирзаевга мурожаат қилдик. 

“Тўғри айтдингиз Иордания, Эрон, Бангладеш бу гуруҳдан жой олди. Барча аёллар миллий терма жамоаларининг машғулотлари “Бунёдкор” академияси майдонларида бўлиб ўтади. ОЧЛ баҳслари вақтида бош жамоамиз асосий майдондан фойдалана олмади. Лекин “Бунёдкор” – “Локомотив” ўйини барибир “Бунёдкор” стадионида ўтказилади. “G” гуруҳидан ўрин олган Иордания – Бангладеш ўйини 19 сентябрь куни мазкур стадионда ташкиллаштирилади. Тақвимга кўра, 22 сентябрь куни Эрон ва Бангладеш ўзаро тўқнашади. Биз мазкур масалада ОФКга чиқдик. Ўзбекистон футбол ассоциациясидан ҳам илтимос қилдик. Ташкилотлар илтимосимизга розилик билдиришди. “Локомотив”га қарши ўйин 21 сентябрь куни “Бунёдкор” стадионида бўлади”,- дейди Улуғбек Мирзаев. 

Бундай паллада майдон майсасига ортиқча оғирлик тушмайдими? Улуғбек Мирзаев бу саволга қуйидагича жавоб берди. 

“Майдон жуда яхши ҳолатда. Аёллар ўртасидаги Осиё чемпионати саралашида 3та учрашувга мезбонлик қиламиз. Билсангиз ОЧЛда стадонимиз 12та ўйинни ўзида қабул қилганди. Ҳеч қандай муаммоси йўқ. Лекин машғулот майдонларимизга катта юклама тушиши мумкин”,- дейди Улуғбек Мирзаев.