“Бунёдкор” Доҳада

“Қалдирғочлар” Доҳадаги “InterContinental Doha” меҳмонхонасига жойлашишди.

Сергей Лушан Қатарга 17 нафар футболчини олиб келган. Булар: дарвозабонлар – Акбар Тўреав ва Муроджон Зухуров, ҳимоячилар – Акмал Шораҳмедов, Хайрулла Каримов, Анвар Ғофуров, Артём Филипосян, Обид Жўрабоев, ярим ҳимоячилар – Шакер Зуаги, Самир Бекрич, Минори Сато, Сардор Собирхўжаев, Мирзохид Ғофуров, ҳужумчилар – Забихилло Ўринбоев, Достонбек Ҳамдамов, Сардор Рашидов, Вохид Шодиев, Темур Аюпов.

Таркибга назар ташлар эканмиз, бир қатор йўқотишлар борлигини кўришимиз мумкин. Масалан, марказий ҳимоячи Иван Милошевич машғулотлар пайтида жароҳат орттириб олган бўлса, Отабек Шукуров, Акрамжон Комилов, Элдор Шомуродов сингари асосий таркибга номзод футболчилар ёшлар терма жамоаси ихтиёрида бўлиб туришибди. Шунингдек, марказий ярим ҳимоячи Жавлон Иброхимов жароҳатидан сўнг ҳамон тикланиш машқларини бажармоқда.

Эслатиб ўтамиз, Осиё Чемпионлар лигаси 4-тури доирасидаги “Лахвия” – “Бунёдкор” учрашуви 8 апрель куни Доҳадаги “Абдуллоҳ бин Ҳалифа” стадионида соат 18:30да (Тошкентда 20:30 бўлади) бошланади.