Бугун футбол. "Шўртан" - "Олмалиқ"

Ғузорнинг "Шўртан" жамоаси ўз майдонида "Олмалиқ"ни қабул қилади. Ўйин 18:30да бошланади. 

Ўйиндан нима кутяпмиз? Бугун Ғузорда қизиқарли баҳс кечиши кутилмоқда. Бунга сабаб иккала жамоага ҳам очко зарур. Имкониятлар борасида жамоаларни тенг дея оламиз. Албатта, "Шўртан" бугун ўз майдонида ўйнайди, лекин "Олмалиқ"нинг ҳам сафардаги ишлари чакки бўлмаяпти. 

Факт: "Шўртан" ҳозиргача тўртта ўйинда ғалаба қозонган ва барча ғалабалар уйдаги учрашувларда қўлга киритилган. "Шўртан" сафардаги барча баҳсларда мағлуб бўлиб келмоқда. Бу жамоа ҳали дуранг ўйнамаган. 

Факт: Бугун "Олмалиқ" сафарда иккинчи ғалабасини нишонлашга уриниб кўради. Бу жамоа ҳозиргача сафарда олтита ўйинда майдонга тушиб, шундан фақат биттасида зафар қучган. Виктор Кумиков шогирдлари 6-турда "Обод"ни 1:0 ҳисобида мағлуб этишган. 

Биласизми? "Шўртан" ўз майдонида "Локомотив", "Пахтакор" "Нефтчи", "Бунёдкор" каби номдор клублардан устун келган-у, бироқ "Машъал", "Қўқон-1912" жамоаларига ютқазиб қўйган. 

Қизиғи шундаки, "Шўртан" ўз майдонида ғалаба қозонган ўйинларда дарвозасидан гол ўтказиб юбормаган. 

Биласизми? "Олмалиқ" кетма-кет еттита ўйиндан бери мағлуб бўлмаяпти. Бу жамоа тўртта ғалабага эришиб, уч марта дуранг ўйнади. "Олмалиқ" охирги марта сафарда "Локомотив"га 0:5 ҳисобида имкониятни бой берган.