Бугун футбол. "Обод" - "Динамо"

“Обод” (Тошкент) – “Динамо” (Самарқанд)
Ҳакамлар: Р. Бобомуродов (Навоий), Р. Шояхмитов (Тошкент), А. Буров (Бухоро), А. Нажафалиев (Тошкент)
Назоратчи: И. Нехочин (Наманган)
ЎзПФЛ вакили: Ф. Магаметов

Ўйиндан нима кутяпмиз? Иккала жамоанинг ҳам ишлари охирги пайтда яхши кетмаяпти. Бу ўйинда ютуқ "Обод"га ҳам, "Динамо"га ҳам ниҳоятда зарур. Ўтган йил "Обод" олий лигага чиққан маҳал кўпчилик "ўзбек "Лестери" таърифини берганди, бу йил "Динамо"ни шундай аташмоқда. Қани кўрамиз, "Лестер" деган номга ким кўпроқ лойиқлигини бугунги ўйинда.

Турнир жадвалидаги вазият: "Обод" 6 очко тўплаган ҳолда охирги ўринни эгаллаб турибди. "Динамо" эса 15 очко билан 6-ўринда бормоқда.

Факт: Бугун "Обод" ўз майдонида бешинчи ўйинини ўтказади. Аввалги тўрт учрашувда Рауф Инилеев шогирдлари уч марта дуранг ўйнаб, бир бор мағлуб бўлишган. Тўплар нисбати 3-4.

Факт: "Обод" уйдаги ўйинларда атиги уч очко тўплаган ва бу борада ҳам охирги ўринда бормоқда. "Динамо"га келсак, самарқандликлар бугун сафарда олтинчи марта баҳс олиб боришади. Жамоа аввалги бешта ўйиннинг иккитасида зафар қучган. "Динамо" сафарда "Металлург" ва "Пахтакор"дан устун келган бўлса, "Бунёдкор" билан дуранг ўйнаган ва "Қўқон-1912" ҳамда "Олмалиқ"қа имкониятни бой берган.

Биласизми? "Обод" қаторасига еттита ўйиндан бери ғалаба қозона олмаяпти. Жамоа охирги марта 3-турда "Бухоро"ни мағлуб этиб қайтган.

Биласизми? Ўз майдонида "Бухоро"дан устун келган "Динамо" шундан сўнг кетма-кет тўрт ўйинни юта олмади: уч дуранг ва бир мағлубият.