Бугун футбол. "Нефтчи" - "Олимпик"

Ўзбекистон олимпия терма жамоасининг ўзагини ташкил этувчи "Олимпик" бугун Яйпанда "Нефтчи" меҳмони бўлади. Биласиз, Фарғонадаги стадион мавсумга тўлиқ тайёр бўлмагани боис ўйин Яйпанда ташкил этилади. 

Турнир жадвалида "Нефтчи" 4 очко билан охирги ўринда бормоқда. Фарғоналиклар ҳисобида 7 ўйиндан фақат битта ғалаба бор. Жамоа дастлабки турда "Қўқон-1912" устидан 1:0 ҳисобида ғалаба қозонганди. Шунлан сўнг "Нефтчи" қаторасига 4та мағлубиятни қабул қилди. 

Самарқандда "Динамо" билан 1:1 ўйнаган жамоа ўтган тур яна Яйпандаги ўйингоҳда мағлубиятга учради. Бу сафар "Локомотив" ғалаба қозониб кетди. Жорий мавсум Суперлигага қайтган "Нефтчи"нинг негадир омади келмаяпти. Шу боис ҳам ҳар ўйиндан сўнг бош мураббий Илҳом Мўминжоновнинг истеъфоси ҳақидаги гаплар қулоққа чалиняпти. 

"Олимпик" ҳақида гапирадиган бўлсак, "Суперлига" дебютанти 7 ўйинда 7 очко жамғаришга улгурди. "Олимпик" ҳам ҳозирча битта учрашувда ғалаба қозонган. Тимур Кападзе шогирдлари "Бунёдкор"ни 5:1 ҳисобида мағлуб этиб, анча шов-шув кўтаришди. Лекин ўтган тур жамоа ўз майдонида "Динамо"ни енга олмади ва 1:1 ҳисобида дуранг натижа қайд этди. "Олимпик"да тўплар нисбати ҳам яхши 8-6. 

Бугун Яйпанда қизиқарли тўқнашув кечиши кутиляпти. Негаки ғалаба ҳар икки жамоага зарур. Айниқса "Нефтчи" жуда қийин аҳволда қолган. Балки бугунги ўйин Илҳом Мўминжонов учун охирги имконият бўлиши ҳам мумкин.

10 май, сешанба

19:00. НЕФТЧИ – ОЛИМПИК

Ҳакамлар: Аҳрол Рисқуллаев, Санжар Шоюсупов, Алишер Усмонов, Иброҳим Исмоилов

Назоратчи: Игорь Нехочин

VAR ҳаками: Аскер Нажафалиев

VAR ассистенти: Максим Нехочин

Комиссар: Шерзод Ражабов