Бугун футбол. "Локомотив" - "Сурхон"

Учрашув аслида Термизда ўтказилиши керак эди, бироқ коронавирус пандемияси сабабли Тошкентга кўчирилганидан хабарингиз бор. Мусобақа жадвалида "Локомотив" 9 очко билан 8-ўринда боряпти. Тўплар нисбати 9-10. "Сурхон" эса 4 очко тўплаган ҳолда 12-ўринни эгаллаб турибди. "Сурхон"да тўплар нисбати 7-15.

Карантиндан сўнг кетма-кет 3та мағлубият қабул қилиб олган "Локо" ўтган турда ғалабага эришди. "Темирйўлчилар" уйда "Қизилқум" устидан 3:0 ҳисобида зафар қучишди. Авазбек Ўлмасалиев, Кирилл Погребняк ва Диёр Туропов томонидан киритилган голлар "Локо"га бу йилги Суперлигада учинчи ғалабани тақдим этди. Аввалги иккита ғалаба ҳам уйда "Андижон" ва "Бухоро" устидан қўлга киритилганди.

"Сурхон" эса аксинча 3-турдан бери ғалаба қозона олмаяпти. Термизликлар бир бор дуранг ўйнаб тўртта беллашувда имкониятни бой беришди. Хусусан жамоа охирги 3 ўйинда фақат мағлуб бўлди. Бу мағлубиятлар АГМК, "Қўқон-1912" ва "Пахтакор" билан кечган баҳсларда қайд этилди. 

Бугунги учрашув "Локомотив" учун ўз майдонидаги 6-ўйин бўлади. Аввалги бешта баҳснинг учтасида ғалаба қозонган "темирйўлчилар" икки марта мағлуб бўлишган. "Сурхон" эса бугун сафарда бешинчи бор майдонга тушади. Бу жамоа ҳозирча сафарда бир марта ютуққа эришган: Навоийда "Қизилқум" 2:1 ҳисобида мағлуб этилган. 

P.S. "Локомотив" - "Сурхон" учрашувини соат 19:00дан бошлаб "Маҳалла" ТВда тўғридан тўғри кузатиб боринг.