Бугун футбол. АГМК - "Қизилқум"

Аввало шуни айтиш керак, бугунги ўйин АГМК учун олий лигадаги 300-учрашув бўлади. Турнир жадвалида иккала жамоа ёнма-ён ўринларда бормоқда ва ҳар икки клуб бунгача 20 очкодан жамғарган.

АГМК ўтган тур Қаршидан ғалаба билан қайтди, "Қизилқум" эса ўз майдонида "Бухоро"га ютқазиб қўйди. АГМК шу пайтгача ўз уйида 9та учрашув ўтказиб, шундан фақат иккитасида ғалабага эришган. Олмалиқликлар уйда "Локомотив" ва "Бухоро"дан устун келишган. Тўртта ўйинда дуранг қайд этилган бўлса, уч марта жамоа имкониятни бой берган. Тўплар нисбати 7-7.

Кўриб турганингиздек, АГМК ўз майдонида кўп гол ура олмаяпти. Бу жамоа сафарда бирмунча кўпроқ тўп киритган (11та). АГМК охирги икки турда ғалабага эришди ва бугун ҳам зафар қучадиган бўлса, биринчи марта кетма-кет учта учрашувда ғалаба қозонган бўлади.

Сафарда 9 бор майдонга тушган "Қизилқум" шундан учтасида уч очколи бўлган. Жамоа сафар ўйинларида "Сўғдиёна", "Қўқон-1912" ҳамда "Нефтчи"ни мағлуб этиб қайтган. "Қизилқум"нинг сафар учрашувларидаги тўплар нисбати 8-11.

Навоийда кечган биринчи давра ўйинида майдон эгалари 3:0 ҳисобида зафар қучишган. Бу ҳозирча Ҳамиджон Актамов шогирдларининг ушбу мавсум ҳисобидан ягона йирик ҳисобдаги ғалабаси бўлиб турибди.