Биринчи лига. Пулька Наманганда ўтади

Яъна жамоалар “Шарқ” ва “Ғарб” минтақасига ажратилди. Ҳар бир минтақада 12тадан жамоа бўлди. Биринчи босқичда турнир жадвалининг охирги тўртта ўринни эгаллаган жамоалар иштирокини тўхтатганди. “Шарқ” минтақасида иккинчи босқичда ҳам иштирок этиш ҳуқуқини қўлга киритган “Янгиер” молиявий муаммоларга дуч келгани боис, унинг ўрнини якунда Тошкентнинг “Истиқлол” жамоаси тўлдирди. Шунингдек, Наманган вилояти, Уйчи тумани вакили “Хотира-79”, Тошкентнинг “Бунёдкор-2” ва “Локомотив-БФК” жамоалари ҳам курашни тўхтатганди. “Ғарб”дан эса бу борада “Бухоро-2”, “Ғаллакор”, “Сурхон” ҳамда Зомин” жамоалари иккинчи босқичда иштирок этиш ҳуқуқини қўлга кирита олмади.

БАДАЛ 3 МИЛЛИОН СЎМ
Эндиликда ушбу жамоалар иштирокида биринчи лигада кейинги йил иштирок этиш учун пулька ўйинлари ўтказилади. Бу йил ушбу қолиш турнирига Наманган вилояти мезбонлик қилади. Дарвоқе, Наманганда ўтиши режалаштирилган пулька ўйинлари 6 октябрдан то 16 октябрга қадар давом этади. Унда турнир регламентига кўра, 8та жамоа иштирок этади. Унда иштирок этувчи жамоалар барча ҳаражатларни ўзи амалга ошириш билан бир қаторда, ПФЛ ҳисоб рақамига 3 миллион сўм пул ўтказиб берилиши маълум қилинган. Хўш, жамоалар пулькага қанчалик тайёр? Суриштирувларимиз натижасида шунга амин бўлдикки, “Ғарб” минтақасидаги “Ғаллакор” ва “Сурхон” аллақақон машғулотларга киришиб, тайёргарликни бошлаб юборган. “Зомин” раҳбарлари эса келаётган душанба куни футболчиларни йиғишни режалаштириб турибди. “Бухоро-2” вакили боғланганимизда эса, пулькани қаерда ўтишини билмаслигини айтиб, очиғи бизни хайрон қолдирди. Лекин жамоа мураббийлари 1995-1996 йилда туғилган футболчилар билан машғулот олиб бормоқда ва улар пулькада иштирок этишга умид қилмоқда.
“Шарқ” минтақасида эса “Янгиер” ҳамон ҳомийлар эътиборига мухтож бўлиб турибди. Жамоа футболчилари иккинчи босқични бошқа клубларда ўтказиш учун “Янгиер” билан хайрлашган. Бундан ташқари бош мураббий Хайрулла Абдиев ҳам “Чуст-Пахтакор”га ўтиб кетган. Шу боис катта эхтимол билан “Янгиер” Намангандаги лигада қолиш турнирида иштирок эта олмайди.

Мусобақага мезбонлик қилувчи вилоятнинг вакили бўлмиш, “Хотира-79” бош мураббийи билан бу борада суҳбатлашганимизда, Шавкат Аҳмедов, “пулькада албатта иштирок этамиз” деган жавобни берди.

Тошкент жамоаси “Локомотив-БФК”да моддий томондан муаммо йўқлигини инобатга олиб айтадиган бўлсак, бу клубнинг ҳам пулькада иштирок этишини бемалол таҳмин қилиш мумкин.

Сергей Лушан бошқарувдаги “Бунёдкор-2”нинг келгуси мақсади қандай эканлигини очиғи билмадик.