"Бир ўқ билан икки қуён". Флорентино Перес қандай қилиб "Реал" президентига айланган?

2000 йилнинг ёзида "Камп Ноу"ни беш йил давомида жамоа рамзи сифатида саналган Луиш Фигу тарк этди. Шунчаки кетгани йўқ, у 38 млн. фунт эвазига "Барселона"нинг ашаддий рақиби "Реал"га ўтди. Бу трансфер Фигуни бир умрга Каталония клуби мухлисларининг душманига айлантирди.

Бироқ йиллар ўтгандан сўнг келишув деталлари маълум бўлди ва энди бунга умуман бошқа томондан қараш керак. Фигу ўзи ва агенти нафсининг қурбонига айланди, Флорентино Перес эса бундан ўз мақсадлари йўлида моҳирона фойдаланиб қолди.

2000 йилда Фигу мақтовлар дарёсида чўкаётган эди. Ўша йили  FranceFootball нашри унга "Олтин тўп" совринини топширди. "Реал" эса халқаро аренада муваффақиятли ўйин кўрсатаётган эди. "Қироллик клуби" 1998 ва 2000 йилларда Чемпионлар лигаси ғолибига айланди. Бироқ ушбу муваффақиятлар ўша пайт клуб президенти бўлган Лоренцо Сансга ўз ўрнини сақлаб қолишга ёрдам бермади. "Реал"да молиявий муаммолар бор эди ва Санс уни ҳал қила олмади.

Испаниянинг энг бой инсонларидан бири Флорентино Перес президентлик учун курашга қўшилди. Перес буни амалга ошириш учун клуб молиясини ўнглашга боғлиқ ваъдалар етишмаслигини яхши тушунарди. "Қаймоқранглилар"нинг бўлажак президенти айёрликка ўтди. Флорентино клуб аъзоларига сайловда ғалаба қозонса, жамоага рақибнинг асосий етакчиларидан бири Луиш Фигуни олиб келишни ваъда берди. Перес бу билан "Реал" ҳамма нарсага қодир Испаниянинг энг яхши клуби эканлигини исботламоқчи эди.

Перес мақсадни амалга ошириш учун айёр режа ишлаб чиқди. У Фигу агенти билан боғланиб, португалиялик кўзи билан қараганда идеал келишув таклиф қилди. Луиш шартнома имзолаш учун 1,6 млн. фунт миқдорида аванс олиши белгиланган эди. Агар Перес президентлик сайловларида зафар қучмаса, "Барселона" ярим ҳимоячиси шартнома учун белгиланган пулни ҳеч қандай шартларсиз ўзида олиб қолиши мумкин эди.

Фигу билан келишувгача ҳаммаси "Реал" президенти Санс фойдасига ҳал бўлаётган, Переснинг имкониятлари жуда камдек кўринаётганди. Фигу келишувга рози бўлди ва ҳар қанақасига вазиятдан яхшигина даромад билан чиқишини ўйлади. Келишув пайтида на футболчи ва на унинг агенти бу ҳақида ОАВда эълон қилиниши ва Каталония клуби мухлислари Фигуни ёмон кўриб қолишларини ҳаёлига ҳам келтирмаганди. 

Португалиялик "Барселона"ни тарк этиш ҳақида режа тузмаганди. Фигу ОАВда чиқиш қилиб, бу гап-сўзларга "Реал" президентлик лавозимини кўзлаётган Флорентино Перес айбдор эканини айтди. Унинг гапларини Мадрид клуби раҳбари Лоренцо Санс қўллаб-қувватлади.

"Бундай нарсаларга ишонадиган даражада аҳмоқ эмасман. Луиш Фигу фаолиятини "Барселона"да давом эттиради ва у 24 июль куни янги мавсумга тайёргарлик кўриш учун Каталония клуби базасида пайдо бўлади. Бошқача бўлиши мумкин эмас" - деганди Санс.

Бироқ Перес айёрликка қўл урди. У сайловчилар билан учрашиб, агар ғалаба қозонса, бироқ ўша ёзда Луиш Фигуни қўлга кирита олмаса, учрашувда иштирок этаётганларнинг барчасига бутун мавсум учун текин жой ажратиб беришни ваъда қилди. Ваъдани бажариш учун Пересда пул етарлича эди, бироқ айёр Флорентино ўз чўнтагидан пул сарфлашни ҳаёлига ҳам келтирмади. У эҳтиёткорлик билан Фигу имзолаган шартнома остига қуйидаги бандни киритиб қўйди:

"Агар Перес "Реал" президентлиги учун сайловларда ғалаба қозонса, аммо Луиш Фигу ўз хоҳиши билан Мадрид клубига ўтмаса, футболчи "Қироллик клуби" ҳисобига 19 млн. фунт ўтказиб бериши керак".

Фигу Перес ўйинидаги қўғирчоққа айланиб қолди. Сайловларда Флорентино зафар қучди, энди Фигу "Реал"га ўтиши учун "Барселона"га 38 млн. фунт тўлаш керак эди. Бу маш-машаларни фақат бир киши - 2000 йилнинг июлида "Барселона" президентлик сайловларида ғалаба қозонган Жоан Гаспар тўхтатишга қодир бўлган.

Фигу Гаспардан "аср келишуви"ни бекор қилишда ёрдам сўради. Бунинг учун битта нарса - "Барселона" Фигунинг 19 млн. фунтлик қарзини "Реал"га тўлаб бериши керак эди. 19 млн. фунт ўша давр учун тарихдаги энг қиммат 5-трансферга тенг пул бўлган. "Барселона" ўз футболчисини сақлаб қолиш учун ашаддий рақиби "Реал"га жуда катта пул тўлаши керак эди.

"Бундай қила олмайман. Яқиндагина "Барселона" президентига айландим ва биринчи ишим "Реал" мухлисларига текин жой олиб бериш учун 19 млн. фунт тўлаш бўладими? Ундан кўра ўлганим яхши" - деганди Гаспар.

Перес айнан шундай реакцияга умид қилган эди. Флорентино нафсини жиловлай олмайдиган Фигу ва унинг агентини қўлга туширди, бундан ташқари "Барселона"нинг янги президентига фақат битта йўлни қолдирди.

Фигу "Сантьяго Бернабеу"да "Реал" ўйинчиси ва дунёнинг энг қиммат футболчиси сифатида таништирилди. 10-рақамли афсонавий футболкани Альфредо Ди Стефанонинг ўзи топширди. Фигу таништирув маросимида бахтли кўринмади. У нималар қилиб қўйганини яхши тушунган эди.

Воқеалар бундай ривож топишига қарамасдан, Фигу "Реал"да мавсумни юқори даражада ўтказди. Биринчи мавсумидаёқ у "Қироллик клуби" билан Испания чемпионига айланди, 2002 йилда эса "бланкос" сафида Чемпионлар лигасида зафар қучди. Аммо "Барселона"га қарши баҳсда "Камп Ноу"да майдонга тушишга тўғри келди. Хуштаклар чалинди, ҳақорат қилишди, хатто майдонга чўчқа бошини улоқтиришди.

Перес "Реал"га Зидан, Роналдо ва Бекхэмларни олиб келиб, "галактикос"ни яратди, аммо бу трансферлар Фигу иши каби шов-шувли бўлмади. Сайёрамизнинг энг яхши футболчиси ўзи яхши кўрган "Барселона"дан кетиб, нотаниш "Реал"га ўтди. Переснинг таваккалга асосланган режаси иш берди.