Бир нечта футболчилари жароҳат олгани айтилган Австралия машғулотларга зўр беряпти

ЎФАнинг дастлабки хабарига кўра, миллий терма жамоамиз Саудия Арабистонига учишдан олдин 29 май куни Дубайда Австралия термасига қарши ўртоқлик учрашуви ўтказиши лозим эди. Лекин нимадир бўлди-ю, бу ўйин бекор қилинди. ЎФА матбуот хизмати бунинг сабабини Австралия терма жамоаси футболчилари жароҳат олгани билан изоҳлаган. 

Маълумот учун, Австралия терма жамоаси 25 майдан машғулотларни бошлади ва шу куни терма жамоа бош мураббийи Грехэм Арнольд 31 футболчидан иборат таркибни эълон қилди. Машғулотларга киришганига энди икки кун бўлган "соккерузлар"нинг бирданига бир нечта футболчиси жароҳат олганини ўқиш негадир ишончли чиқмаяпти. Чунки уларнинг матбуоти бутунлай тескари гапларни айтяпти. 

Австралия терма жамоасининг расмий сайтида ҳам, Твиттердаги аккаунтида ҳам машғулотлар зўр кетаётгани ҳақида ёзишмоқда, турли қизиқ видеолар ва фотоларни беришяпти. Бундан ташқари, Австралия терма жамоаси сайтида Ўзбекистон билан ўйин бўлиши ёки бекор қилингани ҳақида шу пайтгача бир оғиз ҳам гап ёзилмади. Балки уларнинг бундан умуман хабари бўлмагандир. Қуйидаги суратларга қаранг, бир нечта футболчиси жароҳат олган жамоага ўхшайдими?