“Бир футболчи тарихи”. “Манчестер Сити”ни сўнгги дақиқаларда чемпион қилган, Месси билан бир клубда ўйнашни истаган, соғлигидаги муаммо туфайли футболган кетган Серхио Агуэро ҳақида

Бугун, 15 декабрь куни аргентиналик 33 ёшли футболчи ўз фаолиятини якунлашини эълон қилди. Биз бугун футболчининг фаолияти, унинг шахсий ҳаёти, Месси билан дўстлиги ҳақида ҳикоя қиламиз. 

Қисқача биографияси

Серхио Агуэро 1988 йил 2 июнь куни Буэнос-Айрес шаҳрида туғилган. У 2003 йил 5 июлда (15 ёшу 35 кунлигида) Аргентина чемпионатида дебют қилган энг ёш футболчига айланди ва 1976 йилдан буён Диего Марадона томонидан қайд этилган аввалги рекордни янгилади. У ўйинлар пайтида кўпинча Кун лақабли либосида майдонга тушар эди.

У 17 ёшлигида Аргентинанинг ўсмирлар терма жамоасига, 20 ёшида эса ёшлар терма жамоасига чақирилган ва шу ёшлар тоифасидаги иккита жаҳон чемпионатида ғалаба қозонган.  2008 йилги Пекин Олимпиадасида Аргентина терма жамоаси сафида тўп тепиб, олтин медални қўлга киритган. Агуэро Бразилияга қарши кечган ярим финал баҳсида Бразилия дарвозасига 2 та тўп киритган. 2010, 2014 (кумуш) ва 2018 йилларда катталар ўртасида жаҳон чемпионатларида қатнашган. У ЖЧларда жами 12 та ўйин ўтказиб, 2 та гол урган. 2011, 2015 (кумуш), 2016 (кумуш), 2019 (бронза) ва 2021 (олтин) йилги Америка кубоги мусобақалари иштирокчиси ҳисобланади.

Агуэро 2006 йилда 23 миллион эвро эвазига "Индепенденте"дан Европага, Испания чемпионатининг "Атлетико Мадрид" жамоасига ўтди. У ўзини дунёнинг энг яхши ёш футболчиларидан бири сифатида кўрсатди. Агуэро Мадридда бўлганида жамоаси билан биргаликда УЕФА Европа лигаси ва УЕФА суперкубогини ҳам қўлга киритди.

Агуэро 2011 йилда 35 миллион фунт стерлинг эвазига Премьер-лиганинг "Манчестер Сити" клубига ўтган эди. Клубдаги 10 йиллик фаолияти давомида у бешта лига чемпионлигини қўлга киритди, шу жумладан, дебют мавсумининг сўнгги ўйинида охирги дақиқада рақиб дарвозасига гол уриб, Премьер-лига чемпионлигини қўлга киритди. Агуэро Премьер-лиганинг "Олтин бутса"сини қўлга киритди, PFA уни икки марта йилнинг энг яхши жамоасига киритди. У, шунингдек, олтита Лига кубоги, бир бор Англия кубоги соҳиби бўлиб, клубнинг илк УЕФА Чемпионлар Лигаси финалига чиқди. 2021 йилда “Барселона”га эркин агент сифатида қўшилди.

Агуэронинг аварияларга учраши

2017 йили Серхио Агуэро Нидерландияда рўй берган йўл-транспорт ҳодисаси натижасида жароҳат олди. "Goal" интернет нашрининг Аргентинадаги манбаларга асосан хабар беришича, форвард Амстердамга колумбиялик қўшиқчи Малуманинг концертида иштирок этиш учун йўл олган. Мусиқачининг дастуридан сўнг у аэропортга бориш учун ўтирган такси устунга келиб урилган. Хабар қилинишича, ўйинчи хавфсизлик камарларидан фойдаланган, бироқ барибир қовурғаларини шикастлаб олган.

“Мен шифохонага боришим билан шифокордан шанба куни “Манчестер Сити” сафида майдонга туша оламанми ёки йўқлигини сўрадим. У йўқ, деб жаво берди. Кейинги ҳафтада терма жамоа ўйинидаги иштироким ҳам сўроқ остида эди. Кейинчалик мен бу ҳақда яна бир бор ўйладим. Худога шукрки, таксидалигимда камарим тақилган эди”, – деган эди Агуэро ўзи билан содир бўлган ЙТҲ ҳақида.

Серхио Агуэро 2019 йилнинг 16 октябрида ҳам автофалокатга йўлиқди. Агу 80 минг фунт турадиган "Range Rover" русумли автомобилида бахтсиз ҳодисага учради. Ўшанда "шаҳарликлар"  ҳужумчига шикаст етмаганини тасдиқлашган эди.

Месси билан бир клуб сафида ўйнаш истаги ва улар ўртасидаги дўстлик

Серхио Агуэро ҳамиша Лионель Месси билан бир жамоа шарафини ҳимоя қилишни хоҳлаган. Унинг “Барселона”га ўтишининг асосий сабабларидан бири ҳам айнан Месси билан бирга ўйнаш эди. Бироқ бу нарса амалга ошмади. Шундай бўлса-да, Серхио ҳамюрти ҳақида доимо илиқ гапларни айтиб келган.

Серхио Агуэро 2018 йили нега дунёда “Барселона” форварди Лионель Мессига тенг келадигани йўқлигини тушунтириб берган эди. 

"Месси ҳақида нима дейишим мумкин? Лео тўпга уч марта тегиб, учта гол уриши мумкин. Шу сабабли у бошқалардан фарқ қилади ва жаҳоннинг энг яхши футболчиси ҳисобланади", – деган эди Агуэро.

2018 йилнинг май ойида журналистлардан бири Агуэродан Аргентина терма жамоасидан ташқари Месси билан бир жамоада ўйнашни тасаввур эта олиши ёки йўқлиги ҳақида сўраганида, Агуэро қуйидагича жавоб берган: 

“Ўйлашимча, бу ҳақиқатдан йироқ. Аввал бундай имкониятлар бўлган эди. Ҳозир эса биз Лео “Барселона”да, мен эса “Манчестер Сити”да қоладиган ёшдамиз”.

Уларнинг дўстлиги ҳақидаги ҳикоя 2005 йилда бошланган — ўшанда улар биргаликда терма жамоа йиғинида учрашган ва Агуэро Мессини танимаган. Шу пайтгача уларнинг ҳар иккаласи бир-бирини телевизорда кўриб келган, лекин учрашган вақтида буни эслай олмаган. Агуэро “Барселона” ўйнайдиган бола ҳақида нимадир эшитганди, Месси эса 15 ёшли Серхионинг “Индепенденте”даги дебютини кузатган.

Йигитчаларнинг дўстлиги Нидерландияда бўлиб ўтадиган U-20 Жаҳон чемпионатида мустаҳкамланади, улар бир хонага жойлаштирилади.

Лионель Месси Instagram`даги саҳифаси орқали футболчилик фаолиятини якунлаган Серхио Агуэро ҳақида пост эълон қилди:

“Кун, деярли бутун фаолиятинг давомида бирга бўлдик... Бизнинг ажойиб ва унчалик муваффақиятли бўлмаган лаҳзаларимиз бўлди. Аммо бу онлар бизни бирлаштирди ва дўстга айлантирди. Майдон ташқарисида ушбу хотиралар билан яшашда давом этамиз. Америка кубогида қўлга киритилган ғолиблик, Англияда қўлга киритилган ютуқларинг... Ўзинг яхши кўрган ишни якунлашга мажбур бўлганингни кўриш оғир бўлди. Албатта, сен бахтли бўлиб қоласан. Сени яхши кўрадиган инсонлар бундан кейин ҳам сен билан бирга бўлишади. Энди ҳаётингда янги босқич бошланади. Ишончим комил, сен табассум билан олдинга интиласан.

Ҳаётингнинг янги босқичида сенга муваффақиятлар тилайман. Сени яхши кўраман, қадрдон дўстим. Майдонда сени соғинаман, терма жамоада ўтказган вақтларимизни соғинаман.

Агуэронинг уй ва машиналари, хоббилари

Серхио “Барселона”га ўтгунига қадар Манчестердан унчалик узоқ бўлмаган Чешир графлигида жойлашган Олдерли Эжда яшар эди. Ушбу ҳудудда Манчестер шаҳрининг ҳар икки клубидаги кўплаб футболчилар истиқомат қилишади.

Шунингдек, Кун Агуэронинг Майамида ҳам қиймати 9 миллион еврога тенг бўлган ҳашаматли уйи бор. Куннинг ушбу иморатида бешта ётоқхона, бир нечта меҳмонхона ва ошхона мавжуд. Бундан ташқари, уй соҳил бўйида жойлашганлиги билан алоҳида аҳамиятга эга.

Турли манбаларга кўра, Агуэронинг гаражидан Lamborghini Aventador (500 минг евро), Range Rover (100 минг евро), Audi K8 (125 минг евро) ва Nissan GTR (150 минг евро) каби автоуловлар ўрин олган.

Агуэро футбол ўйинлари ва машғулотлардан бўш вақтларида ўғли билан вақт ўтказишни, фильмлар томоша қилишни ва сув спорти билан боғлиқ бўлган барча нарсани яхши кўради. У бўш вақт топди дегунча, яхталар ва гидроцикл томон ошиқади. Бундан ташқари, балиқ овлаш унинг энг хуш кўрган хоббиларидан бири саналади.