Беҳзод Шамсиев: "Ўйин "Бунёдкор" учун яхши, биз учун ёмон ўтди"

"Ўйин "Бунёдкор" учун яхши, биз учун ёмон ўтди. Тўғри, биз учун муваффақиятсиз ўйин бўлгандир, бироқ ҳали мавсум энди бошланганини инобатга олсак, мушкул вазиятдан чиқиб кетишимизга ишончим комил. 

Футболда баъзан омад керак бўлади. Бизга эса омад етишмаяпти. Ўз хатоларимиз эвазига кутилмаган ҳолатларда гол ўтказиб юборяпмиз. Қолаверса, ўз вазиятларимизни голга айлантиришда сусткашликка йўл қўяяпмиз. Тўпни назорат қилиш борасида самарали ҳаракат қиляпмиз, аммо олдинги чизиқда зарбалар йўллашда аниқлик етишмаяпти. Ҳали энди уч тур ортда қолди, шу боис хулоса чиқаришга эрта, деб ўйлайман. Яна бир марта такрорлайман, мен жамоамга ишонаман. Биз бундай синовларни енгиб ўтамиз. 

Албатта, мағлубиятлар руҳий ҳолатимизга салбий таъсир ўтказмасдан қолмайди. Аммо футбол шуниси билан қизиқ. Руҳий тушкунликни фақатгина бирдамлик билан енгиш мумкин холос.

Шу билан бирга, ўз майдонимизга қайтишимиз, маҳаллий мухлислар қаршисида тўп тепиш ҳам қўшимча ёрдам беради. Кейинги учрашувни ўз майдонимизда "Қўқон-1912" жамоасига қарши ўтказамиз. Биз мухлисларимиз қўллаб-қувватловига муҳтожмиз, деди Шамсиев.