Бахтиёр Маметов: “Қосимовнинг маҳаллий журналистларга интервью бермаганлиги ҳақидаги гаплар ёлғон”

Мухбиримиз Камолиддин Алимов айни пайтда Ханойда бўлиб турган терма жамоамиз матбуот котиби Бахтиёр Маметовдан қисқа интервью олди.

"Ўйинга тайёргарлик анча яхши бўлди. Лекин, Вьетнамга учиб келишимиз осон кечмади. Умумий олганда, Тошкентдан Сеул орқали Ханоига етиб олишимиз учун 14 соат кетди. Шу боис, мураббийлар штаби йигитлар ўзларига келиб олишлари учун уларга дам беришди. Ханоидаги илк кунимизда машғулот узоқ давом этмади. Унда ҳамманинг кайфияти аъло даражада эди. Барча Шавкат Саломовни туғилган куни билан табриклади. Миржалол Қосимовнинг маҳаллий журналистларга интервью бермаганлиги ҳақида айтилган гаплар ёлғон. Миржалол Қўшоқовичдан ҳеч ким интервью сўрамади. Аксинча, Рустам Акрамовдан сўрашганди, терма жамоамиз техник директори интервью берди. Маҳаллий  матбуотнинг ўйинга бўлган қизиқиши жуда баланд. Бугун бўлиб ўтган матбуот анжуманида 20дан ортиқ журналист қатнашди. Терма жамоамиз делегацияси Ханойнинг қоқ марказида яшаяпти. Беш юлдузли меҳмонхона стадиондан 5 дақиқалик йўлда жойлашган. Кўчаларда ўйин билан боғлиқ афишалар, банерлар етарли. Бир сўз билан айтганда, эртага "Май Дин" стадиони мухлислар билан тўлиши кутиляпти. Хуллас, ҳаммаси жойида ва жамоа ўйинга тайёр".