Бахтиёр Ашурматов: "Баъзилар Рўзиқул Бердиевга қўл бермаганим ҳақида гапиришди"

Ўйин ҳақида

- Гапнинг очиғи, бугун ютмасак бўлмас эди. Чунки "Насаф" билан ўйиндаги мағлубиятни жуда оғир қабул қилдим. Ўйиндан кейин Рўзиқул ака Бердиевнинг олдига бориб ғалаба билан табрикламаганим ҳақида гапирган инсонлар ҳам бўлди. Шу пайтда жудаям қизишиб кетгандим, бунинг учун узр сўрайман. Рўзиқул акани жудаям ҳурмат қиламан. Ёнига бориб нимадир гапириб юборишдан чўчидим. Айтмоқчи бўлганим, "Насаф" билан ўйиндаги мағлубиятни жуда оғир қабул қилдим. "Сурхон" билан ўйинда йигитларга бугун ютмасак, истеъфо бераман дегандим. Чунки ўзим қўқонликман, кўчага чиқиб, бошни кўтариб юриш ҳам зарур. Мухлисларга ҳам раҳмат айтаман. Таркибимизда муаммолар бор, булар ҳақида гапиришни истамайман. Дилшод Раҳматуллаев, Ойбек Рустамовлар ҳозирда жамоамизга ёрдам бера олишмайди. Мурод Холмуҳаммедов бир ярим ой давомида бизга ёрдам бера олмади.

"Сурхон" билан ўйиндан сўнг раҳбариятдан истеъфо сўрадим, аммо улар бу нотўғри йўл экани айтишди. Уларнинг ишончи менга қўшимча куч бағишлади. Бугун Жавоҳир Сидиқов ва Қувондиқ Рўзиевлар катта ҳажмда ишни бажаришди. Мурод Холмуҳаммедовнинг сафга қайтганидан жудаям хурсандмиз.

Бугун тан олиш керак, "Локомотив" мағлубиятга лойиқ ўйин кўрсатишмади.

- Бугун жамоа биринчи голдан сўнг бир оз сустлашди. Ғалабага ишониб қолдими, ҳужумлар ташкил этишда ўйин бир оз пасайди. Буни қандай изоҳлайсиз?

- Тўғри айтдингиз, дарвозамизга яқин жойда ҳушёрликни оширишимиз керак эди. Рақиб дарвозаси ёнида ижодкорлик учун имконият бўлади. Афсус, ўз хатоларимиз эвазига гол ўтказиб юбордик. Бу "Локомотив"га устунлик бериб қўйди. Бизда қарши ҳужумларда имкон бор эди, афсуски тезкор ярим ҳимоячи Билолхон Тошмирзаев жароҳат олди. Жамшид Ҳасановни ярим ҳимояга сурдик, у кўпроқ вазифани бажаргани туфайли бизда қарши ҳужумда қийинчиликларга дуч келдик. Мурод Холмуҳаммедовнинг ўйинга қўшилгани бизга жуда катта фойда берди.

- "Локомотив" учун "Қўқон-1912" ноқулай рақибми?

- Ҳозир жамоаларда таркиб ўзгарган. Биз ўтган мавсум ҳам "Локомотив" билан ёмон ўйнамагандик. Очиғи, ноқулай ёки қулай рақиб деган тушунчага унчалик ҳам қўшилмаган бўлардим. Бугунги ўйинда йигитлар охирига қадар курашгани ғалабамизга сабаб бўлди деб ўйлайман. 

- Бугун ўйин амалиёти кам бўлган Исломбек Абдуллаевни дарвозага қўйдингиз. Унинг кўрсатган ўйини сизни қониқтирдими?

- Музаффар Абдуллаев ёмон ўйин кўрсатмаяпти. Гапнинг очиғи, охирги ўйинларда мағлубиятга учраётганимиз сабабли Исломбек Абдуллаевга имкон бердик. Ғалаба эришдик, демак унинг ўйинидан қониқдим. Абдуллаев бир гол ўтказиб юборди, бироқ бу вазиятда Хуршид Мухторов жарима зарбасини чиройли тарзда амалга оширди.