Аъзамов ва Суюновнинг "Насаф"даги хайрлашув учрашуви

"Бунёдкор"га қарши 3-турнинг қолдирилган баҳси бу икки футболчи учун "Насаф"даги хайрлашув ўйини бўлади.

Хабарингиз бор, Элдорбек Суюнов ва Шерзод Аъзамов иккинчи даврадан бошлаб "Пахтакор" шарафини ҳимоя қилиши ҳақида маълумот бергандик. Томонлар трансфер масалаларини деярли ҳал этишган. Ушбу ўйиндан кейин томонлар расмий жараённи якунлашлари кутилмоқда. Бу эса Суюнов ва Аъзамовнинг "Насаф" таркибидаги сўнгги ўйини бўлишини билдиради.

Элдорбек Суюнов (2011-2017)
118 ўйин, 51 "қуруқ", -91 гол.

Элдорбек Суюнов "Насаф" сафида барча мусобақаларда 118 учрашувда майдонга тушган ва жами 91 гол ўтказган. Шулардан 51 ўйинни "қуруқ" ўтказган.

Суюнов ўтказилган учрашувларнинг 87тасини чемпионат доирасида, 18 беллашувни Ўзбекистон кубоги, 1 та ОФК кубоги ҳамда 13 марта ОЧЛ мусобақасида майдонга тушган.

Элдорбек Суюнов "Насаф"га 2011 йилги мавсумда келиб қўшилган. Анатолий Демяненко қўли остида дарвозабон бир марта ОФК кубоги ўйинида майдонга тушишга улгурган. Шундан кейин 2013 йилдан бошлаб асосий таркиб футболчисига айланган.
Бу вақтга қадар Суюнов "Насаф" билан 4 маротаба бронза медалини, Ўзбекистон кубоги, ОФК кубоги, Ўзбекистон суперкубогини қўлга киритишга муваффақ бўлди.

Шерзод Аъзамов (2009-2017)
149 ўйин, 6 гол.

"Насаф" сардори шу кунга қадар барча мусобақаларда "аждарлар" таркибида 149 учрашувда майдонга тушган. Марказий ҳимоячи 6 маротаба рақиблари дарвозасини ишғол этишга ҳам муваффақ бўлган.

Аъзамов "Насаф" сафида ОФК кубоги, ОЧЛ, Олий лига, Ўзбекистон кубоги ва Ўзбекистон суперкубогида иштирок этган.
Салкам 8 йиллик фаолияти давомида Аъзамов "Насаф" билан кумуш медали, 6 марта бронза медали, ОФК кубоги Ўзбекистон кубоги ҳамда Ўзбекистон суперкубоги соҳибига айланган.

Бугунги беллашув Шерзод Аъзамов учун "Насаф" таркибидаги охирги ва шу билан биргаликда юбилей 150-учрашув бўлади.

Эслатиб ўтамиз, Шерзод Аъзамов ва Элдорбек Суюнов "Машъал" академияси тарбияланувчилари саналишади.