Азамат Абдураимов: "Ўзбекистоннинг Жанубий Кореядан кам жойи йўқ"

Истаймизми ёки йўқ Ўзбекистон олимпия терма жамоасининг бугунги Жанубий Кореяга қарши кечадиган ярим финал учрашувини 1994 йилги Осиё ўйинларига боғлайверамиз. 

Ўшанда турнирнинг ярим финалида Анатолий Бишовец бошчилигидаги Жанубий Корея терма жамоаси 1:0 ҳисобида таслим қилинган. Гарчи рақиблар бир неча бор дарвозамизни ишғол қилишга яқин келганига қарамай дарвоза тўсини ва Юрий Шейкиннинг сейвлари бунга йўл қўймаганди. Ўйиндаги ягона голга эса Азамат Абдураимов муаллифлик қилган.

Голнинг видеосини томоша қилиш учун БУ ЕРГА ўтинг.

"Орадан деярли 30 йил ўтиб Осиё ўйинларида терма жамоамиз ярим финалга чиқди ва улар бугун Жанубий Кореяга қарши ўйнайди. Тўғри ҳозир миллий эмас олимпия терма жамолари иштирок этмоқда. 29 йил олдин бизга қийинроқ эди. Чунки ўшанда халқаро майдондаги илк расмий мусобақамизда қатнашганмиз. Жанубий Корея терма жамоаси 1994 йил АҚШда бўлиб ўтган Жаҳон чемпионатида иштирок этиб қайтганди. Уларнинг ўйинларини кўриб корейслар биздан кучлироқ эканлигини билиб тургандик. 

Бу сафар эса ҳаммаси бошқача. Олимпия терма жамоамизнинг Жанубий Кореядан кам жойи йўқ. Кападзе жамоаси Осиё ўйинларига яхши тайёргарлик кўрган. Футболчилар узоқ йўлни босиб ўтишди. Халқаро ўйинларда тажриба тўплашди. Шу боис жамоаларнинг имкониятларини тенг, деб ўйлайман. Ишонаманки, терма жамоамиз ғалаба қозонади ва 29 йил аввалги каби финалга чиқишади. Уларга омад тилаймиз", - дейди Азамат Абдураимов. 

Абдулазиз Искандаров