“Аякс-95” юлдузларини эслаймиз: Овермарс, Зеедорф, Райкаард...

Ўшанда Амстердамнинг “Аякс” клуби Фабио Капеллонинг “Милан”и билан тўқнашган, ўйин тақдирини заҳирадан майдонга тушган 18 ёшли Патрик Клюйвертнинг ягона голи ҳал қилганди. Ўша мавсум амстердамликлар шарафини ҳимоя қилган барча футболчиларнинг кейинги фаолияти муваффақиятларга бой бўлди. Жамоага устозлик қилган Луи ван Гаал эса Европанинг топ-мураббийлари қаторига кирди.

Марҳамат, “Аякс-95” юлдузларини яна бир бор эсга оламиз.

Эдвин Ван дер Сар

Кейинчалик “Ювентус” ва “Манчестер Юнайтед” постини қўриқлаган дарвозабон бугунги кунда “Аякс” клуби бош директори лавозимида фаолият юритмоқда.

Кларенс Зеедорф

Кейинчалик “Реал”, “Интер” ва “Милан”да ўйнаган футболчи 2014 йилда (ҳозирча) ўта муваффақиятсиз чиқаётган мураббийлик фаолиятига старт берганди. Кларенс айни дамда ¬– ишсиз. У сўнгги бор Камерун МТЖни (2018-19) бошқарганди.

Франк Райкаард

Юқорида эслаганимиз “Вена финали”дан кейин фароиятини якунлаган Райкард дарҳол мураббийлик фаолиятини бошлаб юборди. У Нидерландия терма жамоаси (1998-2000), “Барселона” (2003-08) ва Саудия Арабистони миллий жамоаларини (2011-13) бошқаришга улгурган.

Микаэль Рейзигер

“Милан” ва “Барселона”да ҳам ўйнашга улгурган Рейзигер айни пайтда “Аякс” бош мураббийи Эрик тен Хагнинг асистенти ҳисобланади.

Марк Овермарс

Овермарс “Арсенал” ва “Барселона”да ҳам муваффақиятли тўп тепганди. У ҳозир “Аякс”нинг спорт директори ҳисобланади.

Яри Литманен

“Барселона” ва “Ливерпуль”да ҳам ўйнашга улгурган футболчи фаолиятини якунлагач, финландиядаги телеканаллардан бирида спорт эксперти сифатида ишлай бошлади.

Патрик Клюйверт

“Милан” ва “Барса”да ўйнади. Айни дамда “Барселона” академиясини бошқаряпти. Патрикнинг фарзанди Жастин Клюйверт “Рим”нинг “Рома”сида тўп тепаётганидан хабарингиз бор.

Нванкво Кану

“Аякс”дан кейин “Интер” ва “Арсенал”да ўйнаган футболчи бугунги кунда Нигериянинг “Sports TV” телеканалининг хўжайини ҳисобланади.

Финиди Жорж

Ўша таркибда 7 рақамига эгалик қилган Жорж “Аякс”дан кейин 5 йил давомида “Бетис” учун тўп тепди. Бугунги кунда Мальоркада истиқомат қилади.

Эдгар Давидс

Эдгар Амстердамдан кетиб, “Интер”, “Милан” ва “Ювентус” клубларида ўйнашга улгурган кам сонли футболчилардан бирига айланди.

Винстон Богард

“Милан”, “Барселона” ва “Челси”да ҳам фаолият олиб борди. Айни пайтда “Аякс”нинг ёшлар жамоасини шуғуллантиради.

Данни Блинд

Ўша жамоанинг сардори ҳисобланган Данни (Дейли Блинднинг отаси) фаолиятини “Аякс”да якунлади. Нидерландия терма жамоаси ва “Аякс”да мураббий сифатида ишлаш бахтига ҳам сазовор бўлган.  

Франк ва Рональд Де Бур

Ака-укалар “Барселона”да ҳам бирга ўйнади. Фаолиятини якунлагач, Франк бир муддат “Аякс”ни бошқарган бўлса, Рональд клубнинг ёшлар жамоасида ишлади.

Луи Ван Гаал

Юқорида таъкидланганидек, Ван Гаал топ даражага чиқди ва “Барселона”, “Бавария”, МЮ, Нидерландия терма жамоасида ишлади.

Фахриддин Рўзиев тайёрлади