"Атлетик" Испания футбол федерацияси ва Ла Лигадан Уильямснинг "Барса"га ўтишига йўл қўймасликни сўрамоқчи

Аввал хабар қилинганидек, каталонияликлар 22 ёшли қанот футболчиси учун 1 ёки 2 июлда 62 миллион евро тўловни амалга оширишни режалаштирмоқда, бу харажатлар кейинги молиявий йилга ўтказилиши кўзда тутилган. Шу тариқа "Барса" молиявий фейр-плей қоидаларига амал қилишни режалаштирмоқда.

Cadena SER маълумотига кўра, айни пайтда Мадридда бўлиб турган "Атлетик" президенти Йон Уриарте ва бош директор Йон Берасатеги Ла Лига ва Испания қироллик футбол федерациясига "Барселона"нинг барча молиявий операцияларини текшириш зарурлиги ҳақида хабар бермоқчи.

"Атлетик"дагилар фикрича, "Барселона" ҳамон молиявий қоидаларга риоя қилишда қийинчиликларга дуч келмоқда. Билбао клуби лига ва федерациядан "кўк-анор ранглилар" "1 га 1" қоидасига қайтмагунча Уильямс билан шартнома имзоламаслигини назорат қилишни сўрашади. 

Taъкидланишича, "Атлетик" "Барселона" билан бевосита қарама-қаршиликка тайёр. Уильямс ўз агенти орқали аллақачон Каталония клубига ўтиш истагини билдирган, бироқ ўтган йили шартномани "Атлетик" футболчининг кетиши бўйича бирор осонлаштирувчи банд қўшилмаган, клуб футболчига бирор ваъда ҳам бермаган.