Асрор Алиқулов: "Бундай майдонда жароҳат олиш даражаси юқори бўлади"

- Ўйин ҳақида

- Курашларга бой ўйин ўтказдик. Бундай учрашувларда характерга асосий урғу қаратилади. Биринчи бўлимда вазиятлар яратдик, бироқ гол ура олмадик. Хатоликка йўл қўйдик ва шунинг оқибатида пенальтидан жазоландик.

Иккинчи бўлимда ҳужумлар ташкил қилдик. Мезбонлар яхши ҳимояланишди, шунингдек вақт чўзишга ҳам ҳаракат қилишди. Гол урдик, бироқ ғалабагача вақт етмади. Бу дуранг қайси жамоа учун керак эди, билмадим. Навбатдаги ўйинларга тайёргарлик қилишда давом этамиз.

- "Қўқон-1912"га қарши ўйин билан таққосласак, таркибда қатор ўзгаришларга қўл урдингиз. Бунинг сабаби нима?

- "Қўқон-1912" билан учрашувда яхши ўйин ташкил қилгандик. Стандарт вазиятларда гол ўтказиб юбордик. "Арал" жамоасида ҳам устун жиҳатлар стандартлар ҳисобланади. Шуларни ҳисобга олган ҳолда таркибга ўзгартиришлар киритдик.

- "Машъал" 15 кун ичида 5 минг километрлик масофани босиб ўтди. Бунда футболчиларда жисмоний чарчоқ кузатилдими?

- Чарчоқ бўлади албатта. Узоқ йўл босиб келинганидан сўнг тикланиш учун вақт сарфланади. Нукусда футболни яхши кўришади. Бироқ, жамоа ўз ўйинларини сунъий стадионда ўтказаяпти. Бундай майдонда жароҳат олиш даражаси жуда юқори бўлади. Кийиниш хонасида кўрдим, футболчиларнинг оёқлари шилиниб кетибди. "Арал" жамоасини ҳам тезроқ сифатли ва табиий майдонларда ўйнашини жуда истаймиз.