Асқар Муҳиддинов "Қизилқум"да

Биринчи даврада жамоа шарафини ҳимоя қилган кўплаб футболчилар клуб лагерини тарк этишган. Шунингдек мураббийлар штабида ҳам сезиларли ўзгариш қилинди. Бунгача жамоа бошқарувида ишлаб келган Рустам Забиров ўз аризасига биноан ишдан кетган бўлса, унинг ўрнини Юрий Лукин эгаллади. Биринчи лига жамоаси "Зарафшон-ПФК"ни бошқарган ушбу маҳаллий мураббий эндиликда "Қизилқум"да вақтинчалик бош мураббий вазифасини бажарувчи сифатида ишлайдиган бўлди.

Ушбу мураббийнинг жамоада иш бошлаши таркибда "Зарафшон-ПФК" футболчиларини пайдо бўлишини таъминлади десак муболаға бўлмайди. Шу боис биринчи лигада ўзини кўрсатишга эришган футболчиларнинг айримлари эндиликда "Қизилқум" шарафини ҳимоя қиладиган бўлди.

Ундан ташқари биринчи даврада "Сўғдиёна"да тўп сурган Ҳуршид Йўлдошев билан Жалил Кимсанов ҳам "Қизилқум" билан келишувга эришган. Шунингдек "Пахтакор"дан Бобур Искандаров ҳам жамоа йиғинига келиб қўшилди. Таркибдаги энг сўнгги ўзгариш деб, Асқар Муҳиддиновни айтиш мумкин. Маълумотларга кўра, яқинда "Бухоро" билан хайралашган Муҳиддинов иккинчи даврани "Қизилқум"да ўтказадиган бўлди.

Клуб расмийлари шу кунларда ПФЛга клуб заявкасини топширмоқда. Бошқа ўзгаришлар хусусида кейинроқ яна маълумот берамиз.

Исломбек Рустамбеков