АПЛ. “Арсенал” – “Челси” ва бошқа ўйинлар учун превью

Хусусан, турнинг марказий ўйини Лондонда, "Арсенал" - "Челси" ўртасида бўлиб ўтади. "Ливерпул" "Энфилд"да "Вулверхэмптон"ни қабул қилса, "Манчестер Сити" ўз уйи - "Этихад"да "Шеффилд"ни меҳмон қилади.

29.12. 19:00 (Тошкент вақти) "Арсенал" - "Челси"
Ушбу жамоалар қандай ўринларда боришидан қатъий назар улар ўртасидаги қарама-қаршилик ҳар доим даҳшатли кечган. Лондон дербисида "қизиллар" ўз майдонида "кўклар"га қандай қаршилик кўрсатаркин, бу ўйинни "ёш мураббийлар жанги" дейишимиз ҳам мумкин.
Энди бевосита таркибларга тўхталиб ўтамиз ва буни "Арсенал"дан бошлаймиз.

- Ҳимоячи Калум Чемберс яна таркибда, у катта эҳтимол билан ўтган турда жароҳат олган Сократиснинг ўрнини эгаллайди.
- "Борнмут"га қарши баҳсда Месут Озил ўзининг яхши тарафларини кўрсата олди. Артета бугунги муҳим беллашувда ундан фойдаланиши мумкин.
- Николас Пепе ҳамда Маттео Гендузилар ҳам жамоага ёрдам беришга шай ҳолатдалар.
- Габриэль Мартинелли жароҳатда ва унинг ўйиндаги иштироки сўроқ остида турибди. Дани Себальоснинг ҳолати бўйича эса барчаси номаълум.
“Челси”да таркиб бўйича кутилаётган янгиликларга тўхталамиз.
- "Челси" бош мураббийи Мейсон Маунтнинг ҳолатидан мамнун, шунингдек, Матео Ковачич ҳам дисквалификациядан сўнг яна қайтди.
- Ёш ҳимоячи Рис Жеймс афсуски, жароҳат олган ва ўйинни ўтказиб юборади. Бироқ, Маркос Алонсо сафга қайтишга жиддий бел боғлаган.
- Машғулотлардаги меҳнати туфайли Каллум Хадсон-Одои ўтган ўйинда ўйин амалиётига эга бўлди. Лэмпард дербида ҳам ундан унумли фойдаланиш истагида.
"Арсенал"га янги келган Артета, "Челси"ни деярли ўзи хоҳлаганидек шакллантириб олган Лэмпардга қандай қаршилик кўрсата олади? Буни бугун оқшомда бўладиган тўқнашувда билиб оламиз.

Ўйинга оид фактлар:
- "Арсенал"нинг охирги 3 уй учрашувида камида 2,5та гол урилган (Премьер-лига).
- "Челси" иштирокидаги охирги 3 ўйинда 2,5тагача гол киритилган (Премьер-лига).
- "Арсенал" сўнгги 11 учрашувдан 10тасида юта олмаяпти (Премьер-лига).
- "Арсенал" ўз майдонида кечган охирги 3 ўйинда камида 2та гол ўтказиб юборган (Премьер-лига).
- "Арсенал" барча мусобақаларда "Челси"га қарши сўнгги 5 уй ўйинларида ютқазмаган.


Тахминий таркиблар
"Арсенал" (4-2-3-1): Лено, Найлз, Чемберс, Луиз, Сака, Гендузи, Жака, Пепе, Озил, Обамеянг, Ляказетт
"Челси" (4-3-3): Аррисабалага, Аспиликуэта, Рюдигер, Томори, Алонсо, Канте, Ковачич, Маунт, Виллиан, Абрахам, Хадсон-Одои

Жамоаларнинг жароҳатланган футболчилари: Холдинг, Колашинац, Тирни, Бельерин, Сократис (“Арсенал”), Рис Жеймс, Ван Гинкел, Лофтус-Чик (“Челси”)
Сўроқ остида: Себальос, Мартинелли (“Арсенал”), Алонсо, Жиру (“Челси”)

29.12. 21:30 "Ливерпуль" - "Вулверхэмптон"
Чемпионлик пойгасида кутилганидан анча ўзиб кетган Юрген Клопп шогирдлари "Сити"ни мағлуб этган "Вулверхэмптон"га қарши тўп тепади.
Клопп ҳимояда ўзгаришларга қўл урмайди, қўл урган тақдирда Трент Александр-Арнолд ёки Эндрю Робертсон ўрнига майдонга Милнерни чапга ёки ўнгга тушириши мумкин.
Шунингдек, бугун Адам Лаллана, Жердан Шакири ва Дивок Оригини майдонда кўришимиз мумкин.

Жордан Хендерсон ўтган ўйинда жароҳат олганига қарамасдан, Клоппнинг айтишича, у ўйинни давом эттира оларди, мураббий таваккал қилишни истамаган ва уни алмаштирган. Бу сафар эса сардорга дам берилиш эҳтимоли бор.

Нуну Эшпириту Санту шогирдлари "Сити" мағлуб этилган ўйинда деярли бор кучини сарфлаганди. Бугун уларнинг ўйини жисмоний тайёргарликларига боғлиқ бўлади.
"Энфилд"да Адама Траоре ва Рауль Хименес ўзларини намойиш этишлари лозим бўлади. Барча Нуну шогирдларидан чиройли ўйин ва муносиб қаршилик кутмоқда.

Ўйинга оид фактлар:
- "Ливерпуль" охирги 16 уй учрашувида фақат ғалабага эришган (Премьер-лига).
- "Ливерпуль" сўнгги 16 уй ўйинида рақиб дарвозасига камида 2та гол киритган (Премьер-лига).
- "Ливерпуль"нинг Премьер-лигадаги охирги 9 ўйинида камида 2,5та гол урилган.
- "Бўрилар"нинг охирги 4 учрашувида камида 2,5та гол киритилган.
- "Бўрилар" охирги 14 ўйиндан 13тасида ютқазмаган (Премьер-лига).
- Премьер-лига доирасидаги охирги 3 меҳмон ўйинда "бўрилар" 2тадан кам гол урмаган.


Тахминий таркиблар
"Ливерпуль" (4-3-3): Алисон, Арнолд, Гомез, Ван Дейк, Робертсон, Милнер, Вейналдум, Кейта, Салах, Фирмино, Ориги
"Вулверхэмптон" (3-4-3): Патрисиу, Дендонкер, Коуди, Саисс, Доэрти, Невиш, Моутинью, Хони, Траоре, Хименес, Жота

Жамоаларнинг жароҳатланган футболчилари: Клайн, Матип, Ловрен, Фабиньо, Чемберлен ("Ливерпуль"), Шабани, Боли ("Вулверхэмптон")
Сўроқ остида: Брюстер, Хендерсон ("Ливерпуль"), Гиббс-Уайт ("Вулверхэмптон")

29.12. 23:00 "Манчестер Сити" - "Шеффилд"
Тушкун кайфиятдаги Гвардиола ва унинг шогирдлари яхши формадаги “Шеффилд”га қарши ўйнайдилар.
"Манчестер Сити"да бир нечта футболчиларда чарчоқ аломатлари бор. Пеп Гвардиола айрим ўзгаришларга қўл уриши аниқ.
Эдерсон ўтган ўйинда қизил карточка олгани боис бугун Браво ўйинга туширилади.
Серхио Агуэро ўтган ўйинда Эдерсоннинг четлатилиши туфайли мажбуран алмаштирилганди. У бу сафар тўлиқ ўйнаши кутилмоқда.
Кевин Де Брюйне "Шеффилд Юнайтед"га қарши ўйнаса керак. У билан биргаликда Фил Фоден, Александр Зинченко ва Илкай Гюндоган ҳам асосий таркибда майдонга тушишлари кутиляпти.
"Шеффилд"нинг захира дарвозабони Саймон Мур - жамоанинг ягона муаммоси, холос.
"Этихад"да "Шеффилд" амалга оширадиган ўзгаришлар фақат ҳужум чизиғида содир бўлиши мумкин.

Ўйинга оид фактлар:
- "Манчестер Сити" охирги 29 уй ўйинидан 25тасида ютган (Премьер-лига).
- "Шеффилд"нинг муҳмонда кечган сўнгги 7 ўйинидан 6тасида 2,5тагача гол урилган.
- "Шеффилд" охирги 9 меҳмон ўйинида мағлубиятга учрамаган (Премьер-лига).
- "Манчестер Сити" охирги 7 ўйиндан 6тасида камида 2та гол киритган.

Тахминий таркиблар
"Манчестер Сити" (4-3-3): Браво, Канселу, Отаменди, Фернандиньо, Зинченко, Фоден, Де Брюйне, Гюндоган, Махрез, Агуэро, Стерлинг
"Шеффилд" (3-5-2): Хендерсон, Бэшем, Иган, О’Коннелл, Болдок, Ландстрём, Норвуд, Флек, Стивенс, Макголдрик, Муссе

Жамоаларнинг жароҳатланган футболчилари: Стоунз, Ляпорт, Сане ("Манчестер Сити"), Мур ("Шеффилд")
Сўроқ остида: Жезус, Д.Силва ("Манчестер Сити")

Шерзод Нурматов тайёрлади.