Анзур Исмоилов: "Хитойдан қўрқадиган жойимиз йўқ"

У Хитой чемпионатида фаолият олиб бормоқда, табиийки бу мамлакат миллий терма жамоаси ҳақида кўпроқ маълумот билади. Кечаги машғулотдан сўнг Анзурдан қисқача интервью олдик.

- Анзур, Хитой билан ўйинга тайёргарлик қандай бўляпти?
- Ҳаммаси жойида. Машғулотлар одатдагидек давом этяпти. Менимча, чиройли ўйин бўлади. Ким яхши тайёр бўлса, ўша жамоа ютади.

- Терма жамоамизнинг ҳозирги ҳолати қандай?
- Биз кўтарилиш босқичидамиз дея оламан. Хитойдан қўрқаётган жойимиз йўқ, насиб қилса, уларни мағлуб этамиз.



- Хитой 1-турда Саудия Арабистонини мағлуб этди. Бу кутилмаган натижа ҳисобланадими?
- Кутилмаган натижа деса бўлади, чунки кўпчилик Саудиянинг ғалабасига ишонганди. Хитой эса омад туфайли ғалаба қозонди деб ўйлайман.

- Сиз Хитой чемпионатида ўйнайсиз, шундай экан уларнинг терма жамоаси ҳақида нима дея оласиз?
- Уларда миллий жамоага доим чақириладиган 50 нафар ўйинчи бор. Хуллас, номзодлар кўп. Бу жамоанинг ярим ҳимояси ва ҳужуми кучли. Шимолий Корея билан солиштирганда хитойликлар анча кучли ва улар футбол ўйнашни яхши кўришади.

Х.Холиқов суҳбатлашди.