Андрей Акопянц: "Ўзбекистон клубидан таклиф оламан деб ўйламагандим"

Ахборот ҳамкоримиз "Футбол Экспресс" газетаси мухбири Акопянцдан интервью олди. Қуйида унинг энг асосий қисми билан танишиб олиш мумкин.

- Сизни яна Ўзбекистонга қайтишингизни кутмагандик. Буни ўзингиз қандай изоҳлайсиз?
- Очиғи, ўзим ҳам бундай бўлади деб ўйламагандим. "Бухоро" таклифи кутилмаганда юз берди. Улар жамоада ўзимни синаб кўришимни айтиб таклиф билан чиқишди. Бу таклифдан жуда хурсанд бўлдим ва ўйлаб ҳам ўтирмай розилик бериб ватанимга қайтдим. Қолаверса, Ўзбекистон менинг ватаним ва бу ерга ҳамига қайтишни хоҳлардим.

- 2009 йил Самарқанднинг "Динамо" клубидан кетгач Россияда фаолият олиб бордингиз. Қайси клубларда ўйнадингиз?
- Россияда "Нижний Новгород", "Луч Энергия", "Факел" ва "Химки" клублари шарафини ҳимоя қилдим. Бу жамоаларнинг барчаси Россия биринчи дивизиони иштирокчилари эди.

- Бу йил 37 ёшга кирасиз. Шу боис фаолиятингизни якунласангиз керак деб ўйлагандик...
- Тўғри, кўпчилик шундай ўйлаганди. Лекин мен футболдан чарқаганим йўқ ва майдонга чиқиб югуришни хоҳлайман. "Химки"дан кетгач бутсаларимни михга илиш ҳақида ўйладим. Бироқ "Бухоро"нинг таклифи фаолиятимни давом эттиришга туртки бўлди.

Б.Турсунов суҳбатлашди.