“Андижон” қачон ютади?

Аслида шу куни андижонлик ашаддий ишқибозлар севимли жамоасидан фақат ва фақат ғалаба кутганди.

Аслида ушбу мақолани “бургутлар”нинг 3-турда ўз майдонида “Машъал”га ютқазганидан кейин ёзмоқчи эдим. Лекин шошилнч хулоса чиқармасдан камида 5-тур ўйинларини ўтказиб олиш керак деган қарорга келгандим. Шу боис келинг дастлаб “Андижон” – “Машъал” қарама-қаршилигига тўхталиб ўтамиз. Бу ўйин кўпчиликда ўзига яраша катта қизиқиш уйғотганди. Чунки ушбу жамоалар ўтган йили биринчи лигадан кучлилар сафига йўл олганди. “Андижон” – “Машъал” баҳси ўтган мавсумда ҳам кескин курашлар остида ўтгани туфайли бу йил мухлислар яна томошабоп ўйин кўришни мақсад қилганди.

Чемпионатнинг илк турини “Пахтакор”га қарши ўтказиб кичик ҳисобда мағлуб бўлган “Андижон” шу куни рақибига жиддий қаршилик кўрсатиб мағлуб бўлганди. Ўшанда мухлислар бундан ортиқча фожеа ясамаганди. Кейинги турда эса сафарда “Қизилқум” билан куч синашган “бургутлар” яна битта тўп эвазига мағлуб бўлди. Бўлиб ўтган дастлабки икки ўйинда рақиб дарвозаси томон йўл топа билмаган “Андижон” футболчиларидан жонкуяр ишқибозлар айнан “Машъал”га қарши учрашувда фақат ғалаба кутишганди. Ҳатто дуранг ҳам уларни қониқтирмасди. Юқорида айтиб ўтдим, ўтган йили бу икки жамоа биринчи лигадан олий лигага чиққан. Ҳар бир клуб қишки трансфер жараёнида ўз имкониятидан келиб чиқиб жамоа шакллантирди. Тан олиш керак, “Андижон”нинг ҳам, “Машъал”нинг ҳам молиявий имконияти деряли бир-биридан катта фарқ қилмайди.

Яхши биламизки, Муборак жамоасида илгари моддий жиҳат юқори бўлган. Бугунга келиб эса ўртача дейиш мумкин. Шахсан ўзим бу икки жамоанинг “Соғлом Авлод” стадионида бўлиб ўтган ўйинини диққат билан кузатдим. Жамоалар таркибига эътибор қаратиб шунга амин бўлдимки, “Машъал” трансфер ойнасида ҳаммасини етти ўлчаб бир кесган ва ёшлардан иборат курашчан жамоа тузган. Таққослаш учун ўтган йили ушбу жамоалар сафида биринчи лигада ўйнаган ва бугунги кунда ҳам ўша футболчиларнинг сонини айтиш мумкин. “Андижон”дан : Раҳим Қодиров, Асрор Раҳмонов, Расул Раҳмонов, Баҳром Абдураҳимов. Қолган 7 нафар ўйинчи бу йил жамоа таркибига янги келиб қўшилган футболчилардир. Энди “Машъал” таркибига эътибор қаратамиз: Санжар Қувватов, Шерзод Файзиев, Мирзоҳид Ғофуров, Ихтиёр Тошпўлатов, Жаҳонгир Абдумўминов, Зоҳир Қўзибоев, Жамшид Ҳасанов. Бу футболчилар ўтган йили “Машъал”ни олий лигага олиб чиққан йигитлар саналади. Қолган 4таси уларга қўшимча сифатида олинган янги ўйинчилардир: Андрей Деркач, Зафар Тўраев, Сирож Ҳамроев ҳамда Ғиёсжон Комилов ҳарид қилинди. Хулоса шуки муборакликлар устози Александр Хомяков ўтган йилги таркиб ўзагини сақлаб қолган холда, олий лигада ҳам кураша оладиган жамоа тузган. Бу борада мураббийга қойил қолмасдан илож йўқ. “Машъал” клубининг чемпионат сўнггидан нечанчи ўринни эгаллашидан қатъий назар шуни айтиб ўтишни истардимки, бу жамоа ўз йўналишига эга бўлган ва шу билан бирга тўғри сиёсат юритаёган кам сонли клубларимиздан биридир.

“Андижон” эса бу йил қишда одатдагидек яна таркибини деряли янгитдан тузди. Анвар Ражабов, Алишер Азизов (“Пахтакор”) ва Жамшид Мирабдуллаев (“Бунёдкор”)ни ижарага олингани айтилмоқда. Эътибор қаратадиган бўлсак, жамоа ҳар йили етакчи клубларимизнинг ўйинчиларини бир мавсум мобайнида ўйнатиб, пишитиб беряпти. Кейин ижарадагилар ўз клубларига қайтиб кетишмоқда. Бу йил ҳам ҳудди холатни кўриш мумкин. Айнан уларнинг таркибга келиб қўшилиши Алишер Тўхтасинов, Акмал Жўрабоев, Дилмурод Маҳмудов, Даврон Турсунов сингари ўтган йили биринчи лигада “Андижон”нинг асосий ўйинчиларидан бири бўлганларни захирада қолиб кетишини таъминламоқда. Балки улар мураббий назарида олий лигада ўйнаб кетишга тайёр эмасдир. Агар шундай бўлса уларни бунинг учун ўтган йили биринчи лигада тайёрлаб бориш мақсадга мувофиқ бўларди. Гўёки “Машъал” сингари. Тўғри қишда Азамат Абдураимов ўз чиқишларида молиявий шароитлар яхши эмаслигини таъкидлаганди. Ва ўшанда имкониятдан келиб чиқиб таркибни шакллантираётганини маълум қилганди. Хўш, айтингчи шу пайтда кимда маблағ бор эди. “Навбаҳор”да ҳам чемпионат стартига қадар моддий имконият кўнгилдагидек бўлмаганлигидан хабаримиз бор. Лекин шунга қарамай наманганликлар устози маҳоратли ва шу билан бирга маҳаллий ўйинчилар иштирокида курашчан жамоа туза олди.

Асосий мавзуга қайтамиз. 4-турни сафарда ўтказган андижонликлар “Олмалиқ” майдонидан нурсиз дуранг қайд этиб келгани мухлисларга юпанч вазифасини ўтаб берди. Лекин кеча “Андижон” ўз майдонида қандай бўлмасин “Динамо”ни ютиши шарт эди. Мухлислар ҳам жорий мавсумдаги илк ғалабани нишонлашни ният қилганди. Аммо якунда ҳаммаси барбод бўлди. Табиийки бош мураббий Азамат Абдураимов ҳам “Динамо”ни мағлуб этишни хоҳлаган бўлиши аниқ. Чунки бу мураббий илгари Самарқанд жамоасида ҳам фаолият юритганди. Биринчи бўлимнинг дастлабки 10 дақиқасидаёқ меҳмонлар тезкор комбинациа уюштириб ҳисобни очишга эришди. Майдоннинг кўп жойларига сув тўпланиб қолгани ҳам футболчиларга янада қийинлаштирди. Чунки бундай майдонларда комбинацион ўйиндан кўра кўпроқ жисмоний жиҳатдан ишлаш талаб этилади. Ҳар икки жамоа ҳам битта майдонда ўйнади. Лекин тан олиш керак, самарқандликлар нисбатан мазмунли ўйин кўрсатди. “Динамо” таркибига эътибор қаратадиган бўлсак, 4та маҳаллий футболчи бошланғич таркибда ўйнаганини кўрамиз: Сирожиддин Сайфиев, Акмал Бозоров, Абдулла Набиев ҳамда Комил Шарофетдинов. Қолган 7 нафари бошқа вилоятдан келган ўйинчилардир.

Муносабатларимизни “Андижон” билан давом эттирадиган бўлсак, бошланғич таркибдан Раҳим Қодиров, Асрор Раҳмонов, Баҳром Абдураҳимов ва Бекзод Ғозиев жой олди. “Андижон”да ҳам қолган 7 нафари бошқа вилоятлик ва узоқ хориждан келган ўйинчилардир. Лекин эътибор беринг “Динамо” сафида битта Андрей Мельничукдан ташқари бошқа легионер йўқ. “Бургутлар” сафида Виктор Расков, Сергей Доценко ва Алексей Касьян ўйнади. Маҳаллий футболчиларни захирада ўтириб қолишига сабаб бўлаётган ушбу трио мана 5-турки қандайдир жиҳати билан маҳаллий ўйинчилардан бир бош устун эканлигини исботлай олишмаяпти. Айниқса ҳужумчи Расковни қандай хусусиятлари эвазига жамоага олингани кўпчилик қатори шахсан мени қизиқтирмоқда. Касьянни ўрнида Иброҳим Отахонов бемалол ўйнаб кета олади. Доценкодан кўра ўтган йили жамоа сафида тўпурарлик маҳоратини ҳм намойиш этган ҳимоячи Даврон Турсуновга имконият берилса мана шундагина маҳаллий ўйинчиларни тарбиялаб уларни кашф этиб берган бўларди.  Кетма-кет омадсиз учрашувлардан сўнг балки келгуси баҳсларда уларнинг ўрнида бошқа маҳаллий футболчилар синаб кўрилар. Яна ким билади дейсиз.

Кеча “Динамо” билан ўйин якунлангач стадионга келган ишқибозлар Азамат Абдураимовнинг истеъфога чиқишини талаб қилган холда чиқиб кетишди. Сир эмаски, “Андижон”да мураббийлар алмашинуви тез-тез учраб туради. Натижа ижобий бўлмаса, талабчан мухлислар янги бош мураббий олиб келишини талаб қилишади. Айни пайтда ҳам вазият шундай тус олмоқда.

Исломбек Рустамбеков.