“Андижон-SGS” ўртоқлик учрашувида Дания клубини мағлуб этди

Режага кўра, Андижонликлар Даниянинг биринчи дивизиони қатнашчиси “Наествед” клубига қарши баҳс олиб борди. Ўйиндан аввал ҳар икки жамоа узоқ йиллар давомида “Андижон вилояти болалар ва ўсмирлар футбол академияси”да ҳайдовчилик қилиб келган марҳум Абдуллаев Солижон Садирович хотираси учун бир дақиқалик сукут сақлади.

Биринчи бўлимда бош мураббий Шохруҳ Ишанов 2005-йилда туғилган табрияланувчиларимизга ишонч билдирди. Нисбатан каттароқ бўлган “Дания” жамоаси футболчилари устунликка эришишга интилди. Аммо ёшларимиз ҳам бўш келгани йўқ. Жуссаси кичик бўлсада, европаликларга қарши кечган баҳсда майдоннинг ҳар бир қарич ерида жон-жаҳди билан курашган йигитларимиз осонликча таслим бўлишгани йўқ. Шунга қарамай, биринчи бўлиб ҳисобни очиш данияликларга насиб этди. Рақиб ҳужумчиси қулай имкониятдан унумли, фойдаланиб тўпни дарвозабоннинг устидан ҳаволатиб дарвозага жойлаб қўйди 0:1.

Учрашувнинг биринчи бўлимида айтарли голга тортадиган вазият содир бўлмади. Шу тариқа учрашувда ҳисоб бошқа ўзгаргани йўқ.

Иккинчи таймда эса ҳар икки жамоа мураббийлари таркибни бутунлай янгилади. Данияликлар таркибида бўйдор футболчилар пайдо бўлди. Аммо шунга қарамай, “Андижон-SGS” футболчилари ҳужумга зўр берди. Натижада яқинда жамоамиз аъзосига айланган Миржалол Мирзаев рақиб жарима майдони ичида совуққонлик билан тўпга кучли ва аниқ зарба берган холда, учрашувда ҳисобни тенглаштиришга муваффақ бўлди – 1:1.

Шундан сўнг андижонликлар ҳужумни янада кучайтирди. Тўпни назорат қилиш орқали, комбинацион ўйин кўрсатиб рақибни шошириб қўйган “Андижон-SGS” футболчилари ғалаба тўпини ҳам киритишга эришди. Аниқроғи охирги йилларни легионер сифатида ўтказган ва яқинда жамоамиз аъзосига айланган Абубакир Мўйдинов чап оёқда рақиб дарвозаси томон аниқ зарба йўллаб, даниялик посбонни ожиз қолдирди 2:1.

Учрашувда ҳисоб бошқа ўзгармади ва шу тариқа андижонликлар Европа жамоасига қарши кечган баҳсда ғалаба қозонди. Дарвоқе, учрашув якунига етгач, ҳар икки жамоа бир-бирига миннатдорчилик билдириб, эсталик учун суръатга тушди. Бош мураббий Шохруҳ Ишанов “Андижон-SGS” футбол клубининг атрибуткаларидан “Наествед” бош мураббийига эсталик учун совға қилди.

“Андижон-SGS” мазкур учрашувда қуйидаги таркибларда харакат қилди.

Биринчи бўлим:
Асилбек Тожиддинов, Файзулло Нурмухаммадов, Абубакир Режаббоев, Омаджон Турсуналиев, Акбархўжа Нўмонхўжаев, Шохжаҳон Ёрқинбоев, Зайниддин Хамрабоев, Абдушукур Махаматов, Азизбек Усмонов, Хамидулло Каримов, Ўктам Абдумаликов

Иккинчи бўлим:
Абдумалик Нурмухаммадов, Хожиакбар Мўминов, Отабек Мўминов, Дилмурод Абдуқаҳоров, Юрсунали Топволдиев, Шаҳбоз Жумабоев, Озодбек Қаҳҳоров, Шокир Одилжонов, Абубакир Мўйдинов, Миржалол Мирзаев, Абдумуталиб Режаббоев

Голлар: Миржалол Мирзаев, 78. Абубакир Мўйдинов, 89.

Қуйида мазкур учрашувдан олинган фотосуратларни томоша қилинг:

Фото: Рустамхўжа Набихўжаев