“Андижон” лагеридан дараклар

Жамоа аъзолари бунгача “Admiral” меҳмонхонасида истиқомат қилиб келаётганди. Бугун тушликдан сўнг клубимизнинг вақтинчалик қароргоҳи ўзгарди. Айни дамда “Андижон” ФК аъзолари “Оқ-тепа” клуби қароргоҳида истиқомат қилмоқда. Барча шароитларга эга бўлган ушбу база жамоамиз учун ҳар томонлама қулай бўлиши турган гап. Машғулотлар ҳам энди "Оқ-тепа" стадионида ўтади. 

Бугун жамоамиз сафида эътиборга молик ўзгаришлар юз берди. Бир неча йиллардан буён “Андижон” шарафин ҳимоя қилиб келаётган Асрор Раҳмонов билан дўстона равишда хайрлашдик. Унинг келгуси фаолиятига жамоамиз номидан омад тилаб қоламиз. Таркибга эса аввал хабар берганимиздек, Роббим Ҳасанов келиб қўшилди. Сўнгги икки йилни “Навбаҳор”да ўтказган марказий ярим ҳимоячи жорий мавсумни “Андижон”да ўтказиши аниқ бўлди. Бундан ташқари яқинда “Олмалиқ” билан хайрлашган Азамат Исроилов ҳам жамоа машғулотларига қўшилди. Мавсумлар оралиғида маълум муддат “Бухоро” йиғинида бўлган таниқли ҳимоячи Саҳоб Жўраев ҳам бугундан жамоамиз сафига қўшилди. Ҳозирча ушбу футболчиларнинг жамоамиз сафида қолиши маълум эмас. Агарда ҳар икки томон ўзаро келишувга эришса, катта эхтимол билан Исроилов ва Жўраев ҳам бу йил “Андижон”да ўйнайди. 

Дарвоқе, эртага жамоамиз иккита назорат учрашувида майдонга тушади. Режага кўра соат 11:00да “Бунёдкор” академиясига қарашли машғулот майдонида “Бухоро” билан куч синашилади. Тушликдан сўнг эса яъни, соат 14:30да “Оқ-тепа”га қарши ҳам назорат учрашуви ўтказилади. Бундан кўзланган мақсад мураббийлар айни дамда йиғинда бўлиб турган ҳар бир футболчига кўпроқ ўйнаш имкониятини бериб, уларни яна бир бор кўздан кечиришдир. 

“Андижон” ФК матбуот хизмати.