Алишер Никимбаев: "Максим Шацких бир ҳафта ичида Бангладеш, "Реал Мадрид" ва БААга қарши майдонга тушганди"
16 may 2020 16:47
News

Алишер Никимбаев: "Максим Шацких бир ҳафта ичида Бангладеш, "Реал Мадрид" ва БААга қарши майдонга тушганди"

Кеча мухлислар эътиборига ҳавола этилган “Тезкор Студия”нинг навбатдаги сонида Максим Шацких ва Виталий Денисов, Алишер Никимбаевлар меҳмон бўлишди.

Қизиқарли кечган жонли эфир давомида Алишер Никимбаев 1999 йил Ўзбекистон терма жамоаси ва “Динамо Киев” орасида қийин вазиятга тушиб қолган Шацких ҳақида фикрини билдирди.

“Адашмасам 1999 йилнинг охирлари эди. Ўзбекистон терма жамоаси БААдаги Осиё кубогига саралаш баҳсларида, киевликлар эса Чемпионлар Лигасида иштирок этаётганди. Шацких термага ихтиёрига етиб келган ва Бангладеш билан ўйинда гол урганди. Ушбу ўйиндан сўнг эса дарҳол самолётда Киевга учиб кетганди. Терма жамоа аъзолари билан бирга Чемпионлар Лигаси доирасидаги “Динамо Киев” - “Реал Мадрид” жамоалари ўртасидаги ўйинни телевизорда жонли томоша қилгандик. Максим ўша ўйинда майдонга тушган ва яна Абу-Дабига қайтиб келганди. БАА билан ҳал қилувчи ўйинда айнан Шацких гол урган ва ўшанда биз қитъа кубогига йўлланмани қўлга киритгандик”,- деб эслади Алишер Никимбаев.

Маълумот учун, 1999 йил Бангладеш билан ўйин 21 ноябрда, "Динамо Киев" - "Реал Мадрид" учрашуви 24 ноябрь куни Киевда бўлиб ўтган, БААга қарши баҳс эса 27 ноябрь куни ўтказилганди.

Қуйида кечаги "Тезкор студия"ни томоша қилиш мумкин: