Александр Хомяков: "Узоқ давом этган қора анъанани бузиш ёқимли"

Ўйин ҳақида
- Албатта ўз майдонимиздаги очилиш ўйинида бу каби ғалаба ёқимли. Бугунги учрашувга жамоа мухлислари ҳам жуда катта тайёргарликни амалга оширган, буни барчангиз кўрдингиз. Бугунги ғалабада мухлисларимизнинг ҳам алоҳида ҳиссаси бор. Йигитларга ўйин борасида эътирозим йўқ, бунақанги ғалабадан кейин эътироз ҳам бўлмайди. Футболчилар барча кўрсатмаларни тўғри ва аниқ бажаришди, стандарт вазиятларда ҳам яхши ишладик.

- "Бунёдкор" бугунгача мағлуб этилмагани ҳақидаги статистикадан хабардормидингиз?
- Ҳа, бундан хабарим бор эди. Ўзаро ўйинларимиз билан боғлиқ статистикаларни кузатиб чиқдим. "Бунёдкор"га қарши ўйинлардаги узоқ давом этган қора анъана бугун бузилди, бу албатта айтиб ўтганимдек ёқимли.

- Жамоага янги таклиф этилган Зигурскийга бир оз тезлик етишмаётгандек кўринаяпти...
- У ёш футболчи. Ўйиндан ўйинга ўсиб, жамоага мослашиб боради. Зигурскийнинг имкониятларини кўриб, ўрганиб чиқиб жамоага таклиф этганмиз. Унинг майдонда бажарадиган ишлари бор, зиммасига кўплаб вазифаларни юклаганмиз. Зигурский кўрсатаётган ўйиндан қониқиш ҳосил қилаяпман.

- Абдувоҳид Ғуломов бугун ўтган ўйиндан фарқли тарзда бошқа позицияда ҳаракатланди, бунинг сабаби нима?
- Бизда қанот ҳимоячиси билан боғлиқ муаммо бор. Илҳом Алижонов жароҳат олган ва ҳозирда тикланиш жараёнини бошдан ўтказаяпти. Шунинг учун ҳам унинг позициясида бошқа футболчини ўйнатишга мажбур бўлдик.