Александр Волков: "Доим "оқ бўрилар"ни бошқаришни истардим"

"Барчани янги мавсум бошлангани билан табриклайман. Бугун жуда қийин вазиятга тушиб қолдик, аммо йигитлар бор кучлари билан натижани сақлаб қолишга эришишди. Уларга катта раҳмат айтаман. Ғузор халқи футболни севади, шу боис ҳар бир ғалаба улар учун байрам бўлади.

"Бунёдкор"да ишлаганимда ҳам "Шўртан"ни ҳурмат қилардим. Бу жамоа лақаби "оқ бўрилар", фамилиям эса Волков (кулади). Шу боис доим бу клубда ишлашни истаганман.

Кейинги ўйинда бундан ҳам яхшироқ ўйнаймиз. Илк баҳсда барча мураббийлар натижани биринчи ўйинга қўяди. Чиройли ўйинлар эса кейинчалик бўлаверади.

"Шўртан" олдига минимум 6-7-ўринларни эгаллаш вазифаси қўйилди. Бироқ бешликка кира олсак хурсанд бўламиз. Ўтган йил "Бухоро" кучли тўртликка кирганди, бу йил "Олмалиқ" юқори ўринларда юрса керак. Кўпчилик "Динамо"ни аутсайдерга қўшиб қўйишганди, бироқ кўрдингиз улар Бекободда "Металлург"ни мағлуб эта олишди. Футбол шуниси билан қизиқ.

Бу йилги чемпионатимизда сюрпризлар бўлади, қандайлигини вақт кўрсатади", - дейди Волков.

"Шўртан" матбуот хизмати