Акром Комилов: "Ўйинни биз бошқардик, улар пенальтидан гол уришди​"

Ушбу баҳсда томонлар муроса йўлини танлашди 1:1. Қизиқарли кечган ўйиндан сўнг "қалдирғочлар" ҳимоячиси Акром Комилов ўз фикрларини билдириб ўтди.

"АГМКга қарши кечган ўйин жуда ҳам оғир бўлди. Биз ғалаба қозонишимиз мумкин эди. Рақиб дарвозаси олдида кўплаб хавфли вазиятлар юзага келтирдик, аммо улардан фойдаланишда бироз оқсаяпмиз. Бу вақтинчалик ҳолат. Бу ўйинда рақиб жамоа футболчиларидан бирортасини алоҳида ажратиб кўрсата олмайман. Ўйинни биз бошқардик, улар пенальтидан гол уришди ва 1:1 ҳисобида учрашув якунланди. АГМК жамоаси 5 нафар ҳимоячи билан ўйнади. Рақиб жамоа ҳимоя чизиғини ёриб ўтишга қийналдик. Дарвозамизга пенальтидан гол уриб олишганидан сўнг, 10 киши бўлиб ҳимояга ётиб олишди ва рақиб ҳимоя чизиғини ёриб ўтиш ундан ҳам қийин бўлди. Агарда ушбу баҳсда мағлубиятга учрасак, кейинги ўйинлар биз учун жуда ҳам қийин бўлади, деб ўйладим", - дейди "Бунёдкор" клуби ҳимоячиси Акром Комилов

Жаҳонгир Сотволдиев ёзиб олди