Абдуқодир Ҳусанов Ўзбекистоннинг энг қиммат футболчисига айланди

Янгиланишдан сўнг Абдуқодир Ҳусановнинг трансфер нархи 7 миллион еврога кўпайди ва 12 миллион еврога етди!

Ҳимоячи бу мавсум "Ланс" клубининг асосий футболчисига айланиб олди. Ҳусанов бир неча марта ўйиннинг энг яхши футболчиси (ёки камида энг яхшилардан бири) деб топилди. Бундан ташқари, октябрь ойида Абдуқодир Франция чемпионатининг энг яхши ёш футболчиси деб тан олинди. Трансфер нархининг ошишига Ҳусановга Европанинг топ-клубларидан бўлаётган қизиқиш ҳам сабаб бўлди.

Энди Ҳусанов:
• Франция чемпионатида марказий ҳимоячилар орасида 21-ўринда;
• Франция чемпионатида U-21 марказий ҳимоячилар орасида 2-ўринда;
• Осиёлик марказий ҳимоячилар орасида 4-ўринда.

Шундай қилиб, Абдуқодир Ҳусанов айни пайтда Ўзбекистоннинг энг қиммат футболчисига айланиб олди. Бу ўзбек футболи тарихидаги иккинчи натижага айланди: 2021 йилда "Рома"га ўтганидан кейин Transfermarkt Элдор Шомуродовни 14 миллион еврога баҳолаган эди.