Германиядагилар Файзуллаевнинг "Бавария"га ўтиши ҳақида қандай фикрда?

Биз бу хабар борасида қандай фикрда эканини билиш мақсадида Германияда ишлаётган ҳамкасбларимизга мурожаат қилдик.

Франк Линкеш - "Бавария" клубига ихтисослашган немис журналисти (Kicker нашри):
- Бу мен учун кутилмаган янгилик, чунки бу футболчи ҳақида ҳеч қачон эшитмаганман. 100% ҳеч нарсани истисно қилмайман, "Бавария" бозорда жуда фаол. Клуб барча ёш, иқтидорли футболчиларни билади ва уларни кузатади. Назарий жиҳатдан трансферни инкор этиб бўлмайди, аммо "Бавария" ҳозир бор эътиборини таянч ярим ҳимоячи топишга қаратган. Улар бундай футболчини Испания ёки Франциядан қидиришмоқда. Шуни ҳам таъкидлаш керакки, "Бавария" кўпинча Европада машҳур бўлган футболчиларни сотиб олади.

Мирон Гойхман - Германияда яшовчи русийзабон журналист (кўплаб сайтлар, жумладан Championat.asia билан ҳамкорлик қилади):
- ОАВда "Бавария"нинг Файзуллаевга қизиқиши ҳақида пайдо бўлган маълумотлар кўпроқ ушбу шубҳасиз иқтидорли футболчига қўшимча қизиқиш уйғотиш учун қилинган ишга ўхшайди. Германиядан мен таниган кўпчилик журналистлар бу хабарни табассум билан кутиб олишди. Агар "Бавария" бу футболчига ҳақиқатан ҳам қизиққан бўлса ҳам, ҳозир бу трансфер имконсиз. "Бавария" ҳозирги вазиятда Россиянинг ҳеч бир клуби билан ҳеч қандай келишувга эриша олмаслиги аниқ.